Contract hna thawh chhe tur ven

Tun hnaiah Lawngtlai by-pass road-a tlâkdâl (parapet) siam zawh tawh, kuta ben chhiat mai theih thlalak (video) social media-ah a darh a; video a darh hnu lawkah sorkara thuneitute'n hma an la nghal a, tlâkdâl siamte chu January 23, 2025 khan nawr chhiat nghal a ni.

Lawngtlai khawpui sirah kawngpui thar, by-pass road siam a ni a, tlâkdâl eng emaw zat siam tel a ni. Lawngtlaia journalist-te sawi danin, contractor chu David Zochhuanawma a ni a, chumi hnuaiah chuan Bajali company-in sub-contract-in an thawka sawi a ni.

Tlâkdâl siam chhe lutuk video social media-a a darh khan mipuiin mak an ti a, a siamtute mipuiin an dem a; dem àwm tak pawh a ni. Sorkar lama thuneitute'n hma an la nghal vat te, nawr chhiat nghal a ni te, ṭha taka siam nawn leh tura a siamtute an hriattir nghalte hi a lawmawm.

Mizorama hna chhe lutuk te, hna muang lutuk leh a huna thawh zawh a ni lo ṭhinte hi tun hma aṭanga kan harsatna a ni a; Mizoram hmasawnna kal muan chhan pakhat a ni. Sorkar aṭanga hna awm reng reng thawktute'n ṭha takin, rintlak takin, tlo takin thawk zel ṭhin se, a hunah zo ṭhin bawk se, tun ai hian Mizoramin hma a sawn zawk ang a, hmasawnna ruhrel kan nei ṭha zawk tawh ngeiin a rinawm.

Sorkar aṭanga hna (contract hna) awmte sorkara inziak lut contractor leh consultancy firm-te hminga tih ni ṭhin mah se, a thawktu tak tak chu sorkar lai party mite an ni fo tawh. Hetianga hna kal kual vel hi hna chhiat chhan a ni ṭhin a, tihtawp thei ni se a duhawm.

Eng hna pawh ni se, Mizoram hmasawn zelna tur chuan hna ṭha a pawimawh. Hei hi contract hna thawktute'n an hriat chian a ngai a, ram leh mipui hmangaihna leh duhsakna thinlung nen hna rêng rêng thawh a ṭul tak zet.

Contract hna ṭha tur chuan hna viltute leh enkawltute'n mawhphurhna sang tak an nei. Hna rêng rêng ṭha taka thawh a nih theih nan thuneitute'n an vil ngawrh lehzual a ngai. National highway kawngpui siamte pawh a tlo lo hle ṭhin, tun aia ṭha leh tlo a nih theih nan vil ṭhat lehzual a ngai a, hna ṭha lo tur ven ṭhat a ṭul.

Mizoram mipui pawh kan ramin hma a sawn theih nan kan ṭanrual a ṭul a, hmasawnna ruhrel siam hna thawh hrang hrangah kan phak tawkah hma kan lak ve a ṭul bawk.