MLA leh an bial

Champhai Ṭhalai Pawl (CṬP) chuan thuchhuah siamin, June 18 a Champhai District Vigilance & Monitoring Committee ṭhut­khawmnaa tel lo, Champhai district-a MLA palite chu an biala ding tawh lo turin an ngen.

CṬP lamin an district-a MLA ṭhenkhatte'n an bial tana ṭha tur ngaihtuahna hun an dah pawimawh lo an ngai thiam lo hi thil âwm tak a ni a, inthlan dawna bial an ngaihsak nena khaikhin phei chuan lungawi a harsa hle ang. MLA-te hi an bial tana ṭangkai taka hnathawk tura beisei an ni a, mahni bial thil ber pawh ngaihsak hman loa an awm a nih chuan a inhmeh lo hle a ni.

CṬP-te hian an MLA-ten District Vigilance & Monitoring Committee an ngaih pawimawh tawk loh avangin chief minister-ah hial lehkha an lo thehlut tawh a nih si chuan, anni tan chuan an MLA-te laka an lungawi lohna an au chhuahpui hi thil mak a ni lo. Mahni bialtu berin mipui aiawh an nihna tur committee an ṭhulh tawh chuan, bial chhung mipuite tan hian hriatthiam a harsa hle ngei ang.

Hetihlai hian MLA-te hian ṭul leh pawimawh dang an nei ve thei bawk a, bial ngaihsak loh vang liau liau ni lo thil dang pawimawh leh harsatna vanga kal lo an nih erawh chuan hriatthiam chin neih a ṭha ang. Chhungkaw thil leh hrisel lohna thilte pawh a awm ve thei a, chutiang vanga lang lo an nih leh nih lohte pawh zawtfiah tel se a ṭha lehzual awm e.

Engpawhnise Cham­phaia thil thleng hi MLA zawng zawngin inenfiahna atan hmang se, mipui aiawh tura thlan an nih avangin an bial chhung thil ngaihtuahna committee ang chi hi chu dah pawimawh hmasakah nei ṭheuh rawh se. Mahni bial pawh vil hman lo khawpa buai emaw, mahni bial tana pawimawh ngaihtuahnaa tel hman lo khawpa ṭul an nih chuan, an bial mipuite tan thlan nawn an chakawm lo thei hial ang.