Airport chungchang mipui hrilhfiah ni se

Tun hnaiah Mizoram sorkarin Indian Air Force (IAF) hnena Lengpui Airport hlan a tum nia sawi chungchangah sawi a tam hle a, Mizoram mipui ngaihdan a phîr hle niin a lang.

Mipui titi léng vel aṭang chuan Mizoram mipui hian kan airport neih chhun hi mi dang hnena hlan hrim hrim ṭha lo an ti lêm lo a, IAF hnen khera hlan erawh an ngaih a ngam chiah lo niin a lang. IAF hnena Airport hlan duh lo intel khawm pawl indinin, press conference hial an nei a, IAF hnena airport hlan a ṭhat lohna lehkhabu thehlep an tichhuak hial a ni.

Mizoram sorkarin Lengpui Airport atana state sorkar sum sen tam lutuk tihziaawmna tur ngaituahin, Airport enkawl thei tur a zawng. Mahse, IAF lo chu han la thei tur an awm loa sawi a ni a; chuvang chuan IAF hnenah hlan tumin hma a la ta nia sawi a ni bawk.

Lengpui Airport atan hian Mizoram sorkarin sum a séng nasa a, sum leh paiah ngawr ngawr chuan hlâwkna leh hlêp a awm lo a, sorkarin sum tam tham tak a hloh char char tih hi chu mipui hian an hre chiang thawkhatin a hriat.

Mizoram sorkar hian IAF hnenah Airport hlan a tum tak tak a nih chuan hlan a duh chhan te, ram tana a ṭhat zawkna turte mipui hrilhfiah se. Chuti ni loa Mizoram sorkar sum senso chhâwk zângkhaina tur tih chhuanlam ringawta an hlan a, a ṭhatna tur Mizoram mipuiin an hriat si loh emaw, a ṭhat zawk si loh emaw chuan an ngaithiam lo viau ngei ang.

Sorkar hian a khua leh tuite hamṭhatna turin sum tam tak séngin hma a la ṭhin; chu chu sorkar din chhan leh a tih àwm tak pawh a ni. Airport chungchangah pawh hian IAF hnenah hlan a nih a, mipuiin harsatna an tawh phah ṭhin dawn a nih chuan, sum tam tak hum pawh ni se, a ram angin a hlâwk chuang lo theiin a rinawm.

Ram mipui tana ṭha zawk tur a nih chuan sum sên zui zel hi ram leh hnam tana hlâwkna a ni zawk thei àwm e. Chuvangin, sorkar hian sum leh pai ngawr ngawr ni loin, ram leh mipui tana ṭha ber tur ngaihtuah rawh se.