Zirna leh eizawnna

Larsap Lt Gen Nirbhay Shar­ma chuan, Mizoram chu ziak leh chhiar thiam tamna state ni mah se, hei hian eizawnna ṭha leh hausakna a keng tel kher lo tih a sawi a, degree sang neih ringawt aiin eizawnna tlak thiamna neih a pawimawh thu a sawi.

Tun hnaia Mizorama harsatna lian tak pakhat chu lehkha thiam hna hmu lo pung zel hi a ni. Lehkha thiam sang tak tak, an beisei leh an phû ang hna hmu lo an tam tak avangin sorkar tan pawh buaipui tham an ni tawh a, tun ang zela kan kal chuan thil ṭha lo zawk pawh hring chhuak thei a ni. Heng mite hian eizawnna atan sorkar belh an tum a, sorkarin sum a neih loh piah lamah a hna lam a nei daih tawh lo a, 'hna hmu lo' awmin an awm ta hlawm a ni ber mai.

Mizoramah tun hmain eizawn­na mil tura lehkha zir kan kalpui lo a, mipui nawlpui hian zirna kawng tluang pangngai an zawh a, zir chhuah hnuah sorkara hna awm ang angte an zawng leh ṭhin. Hei hi tunah chuan a takin a kalpui theih tawh loh a, eizawnna tur mahnia indap chawp a ngai chho ta a, hei hi zirna in lamah kan inzirtir ṭha tawk si lo a, Mizo ṭhalai tam takin buaina an tawh phah ta a ni.

Hetihlai hian thil lawmawm tak chu tun hnaiah tê hian ṭha­lai ṭhahnem tak an harh a, zirna kawng tluang zawh ringawtin awmzia a nei tawh lo tih an hrethiam a, eizawnna nena inzawm zirna an zawh ngam ta. An zir chhuah huna an kal zelna tur en milin zirna in an pan a, zirna sang tak ni loah pawh eizawnna a ken tel chuan bawh nachang an hre thar a, hmasawnna ṭha tak a ni.

Zirna kan kalpui dan hi tun ang reng a nih chuan lehkha­thiam ni si eizawnna nei si lo inchher­chhuahna ang lekah a chhuak ang tih a hlauhawm a, Larsap sawi ang hian kan zirna hi eizawnna mila siam rem a hun tawh takzet a ni.