Lungawi lohna lantir dan

India sorkar leh BJP lamin India ram hmun hrang hranga freedom fighter chawimawi hlawh lote chawimawi an tum a, Mizoram aṭangin pasalṭha Khuangchera an thlang. He mi duh lo hian zirlai pawlte chuan kawng an dang a, union minister lo zin pawh a programme an
ṭhulhtir a, politician pakhat lim an hal bawk.

Mizoramah hian lungawi lohna lantir hi kan awm ta zeuh zeuh a, tun hnaia kan chet dan hi tun hmaa mite nen kha chuan a inang ta lo hle. Kan thil duh leh kan thil phut tihhlawhtlinna tur hian democracy ramah chuan sorkar pawh kan nawr thiang a, kan ngaihdan puanchhah dan hrang hrang kan nei a; nimahsela midangte khawsak phung tibuai lo zawnga ke pen hi kan zir a ṭul khawp mai.

Tun hnai thil thlengah zirlai an inau khawm a, an thil tih hmasak chu kawngpuia lirthei veivak dan a ni. Heti lo deuh hian an lungawi lohna lantir hi an thiam awm tho si a, ni khat pumhlum Aizawl khawpui traffic an tihbuai avanga harsatna thleng kha a tam hle a ni. Mi tam tak an hnaah an tlai phah a, meeting leh thil pawimawha kal ngaite an tlai a, thil tam tak a tibuai.

Mi lim halte phei hi chu tun hmaa tih zen zen loh a ni a, Vaiho tih kan entawn niin a lang. Mi thlalak a ni emaw, an lim emaw pawh ni se, Mizo leh Mizo hetianga lim/thlalak inhalsak hi chu political party-te inbeihna boruak pawn lamah chuan a thleng tam lo hle. Zirlaite hi an lungawi lo a, an ngaihdan hi Mizo mipui pawhin an thlawp hle niin a lang a; amaherawhchu mi lim hal kher loa kal theih ni se a la ṭha zawk cheu awm e.

Engpawhnise lungawi lohna lantir hi a thiang a, a sawt chang a awm bawk a; lungawi lohna kan lan chhuahtir dan hi thlifim hret ila, kan tum tak tihlawhtling tho siin mi dang tana harsatna siam lo thei ang bera kal hi i zir ang u.