Dan anga hmalak a hun

Chief minister Lal Thanhawla chuan, tunlaiin mi ṭhenkhat kawhmawh bâwl ṭhin an awm tih sawiin, "Mipuite ni tin mamawh gas leh buhfai phurh lo tihbawrhbân tumte lakah dan anga hmalak tur a ni. Dan kenkawhna lamah tumah thlei bik nei loin, mihring chanvo dikna zah chunga hna thawkin, mi zawng zawng dan hnuaiah ang khat vek kan nih hriat reng tur a ni," a ti.

Mizoramah eirawngbawlna gas tihchingpen a hluar hle a, mipuiin a man ngai reng siin gas buk tling lo an lei ṭhin. He thil hi mipuiin sawisel ṭhin mah se, sorkar lamin a man chhuak hleithei lo a, an man chhuah chhunah pawh a driver-te an gas phurh buk tling lo man an chawitir, tihte chauh a ni. Thil tisual ṭhinte tan Mizoram chu hmun hlauhawm lo tak a ni a, gas tichingpen ṭhinte tan lek phei chuan man chhuah chhuna a man chawite chu a na lo a, a hlauhawm lo hle a ni.

Mipui rumna hriain tlawmngai pawl lam an che a, Central YMA lamin an bawhzui a, gas tihchingpenna hmanrua tam tak an mansak a, a tichingpen ṭhintute a hmunah an luh chhuak a, mipui lam chu an lawm hle. He thil avanga lungawi lo driver-te chuan kawhmawh bawlin gas phurtu an ṭhiante chu an dang a, sorkar lam mi ni si loin an gas phurh an endik ṭhin chu an lungawi loh thu an sawi ngam a ni.

Heng driver-te thiltih avang leh, tun hma aṭanga gas an lo tihchinpen fo tawh avangin mipui an lungawi lo takzet a, sorkar a che har an ti hle. Chief minister-in Mizoram Police officer rual hmaah, "Gas leh buhfai phurh lo tihbawrhbân tumte lakah dan anga hmalak tur a ni," a ti a, hengte hi chu chief minister sawi ngai loa dan anga hmalak daih tawh awm a ni.

Engpawhnise gas tihchingpen man chhuah kawngah leh he mi hnua thil kal zelah Mizoram sorkar chu a tih tur ti tawk loah ngaiin mipuiin an dem a, tun hnua he thil hi a thlen nawn tawh lohna turin sorkar hi sorkar angin awm ngam tawh rawh se.