Thil dik lo do tura ṭan rual

Siahaa Legal Metrology chuan January 24, 2025 khan Siaha khawpuia dawrkaite buhfai zawrh an endik a, dawr 16 aṭangin buhfai ip páwna a rih zawng inziak lo leh bûk dik lo ip 153 an man.

Legal Metrology hian nikum lam khan buhfai ip a nih dan tur ni lo leh bûk tling lo eng emaw zat an lo hmu chhuak tawh a, dan ang taka thil ti tawh turin an hriattir a ni. Buhfai ip siam chawp, a rih zawng tarlan loh, duh ang zat zata a man chhiar a hluar avangin fimkhur turin mipui an chah bawk.

Legal Metrology department-a thawktute'n dawrkaite an endik a, dan lo leh dik loa thil tite an hmu chhuak leh dan anga hma an la hi a lawmawm. An hmalakna hian rah ṭha a chhuah zui ngei se, dawrkaite pawhin dan ang taka thil an tih phahna ni se a duhawm.

Mipui hi thil leitu (consumer) vek kan ni a, chutih laiin, thil dik lo leh dan loa thil tih a tamzia sawi a ni ṭhin. Thil man a tozia te, dawrkaite'n hlêp tam lutuk an tum thute sawi a ni fo. Chutih laiin, mipuite'n an lei lo thei si lo a, rilru na tak chunga thil lei an tam tawh viauin a rinawm.

Mizoram mipuiin dawrkai aṭanga dan ang tak leh dik taka thil an lei theih nan Legal Metrology-a thawkte ṭang zel se. Dawrkaite'n dan ang taka thil an zawrh theih nan leh mipuiin bûk dik taka an lei theih nan, mipui hmá ngaiin theihtawp chhuah zel rawh se.

Legal Metrology hi department lian a ni lo a, thawktu pawh an tam lo. Hma la tak tak turin thawktu an indaih lo hle niin a lang a; ram leh mipui tan chak zawka hna an thawh theih nan sorkarin thuam chak zel se a duhawm.

Sumdawnna thil dik lo do tur leh dawrkaite'n dik taka thil an tih theihna turin mipui pawh kan harh a ṭul. Thil lei leh hralhah bûk dik lo leh dan loa thil tih kan hmua kan hria a nih chuan ngawi ral mai loa hma kan lak ngam a, thuneitute hnenah kan thlen ṭhin a ngai. Thil dik lo do tur hian thuneitute leh mipui kan ṭan rual a ngai a ni.