Party-te ṭanrual hun a ni

MNF president Zoramthanga chuan Prime Minister Narendra Modi hnenah lehkha thawnin, Mizoram chu special category state nihtir chhunzawm zel turin a ngen a, India leh MNF inremnaah pawh hei hi ziah tel a nih thu a sawi. Mizoram chief minister Lal Thanhawla pawhin central sorkarin Mizoram leh state ṭhenkhatte duat bika a enkawlna tihtawp tumna a duh loh thu a lo sawi tawh.

Politics hi thu­neihna inchuhna ni mah se, thuneihna an chan huna rawng­bawlsak an tumte chu mi thuhmun tho an ni. Mizorama political party lian pahnihte hian rorelna an chanin Mizoram leh Mizo mipuite tan hna an thawk a, party leh party inrem thei lo ṭhin mah se, an rawngbawl sak turte dinhmun en chuan an inrem ngei a ṭul châng a awm ṭhin.

Tuna special category state tihtawp tumna thuthang hi Mizoram economy dinhmun hrethiam phak chin tan chuan thil ṭha lo tak a ni tih a chiang a, central sorkar-in a bika Mizoram a enkawl chung pawhin sum leh pai leh ei leh bara kan dinhmun hi a la hniam hle a ni. Tuna thuthang anga a bika enkawlna hi tihtawp a nih chuan, a tuartu tur chu Mizoram sorkar leh Mizoram chhunga mipuite hi kan ni ang.

He thilah hi chuan Mizorama political party tinte hi lungrual thei se, central sorkarah hian special category state dinhmun pe chhunzawm zel turin a hu­hoin ngenna siam thei se a ṭha khawp mai. Mizoram sorkar leh political party tinin anmahni theihna zawna an dawrte pawh hi thil ṭha tak ni bawk mah se, Mizorama political party zawng zawng inlungrualin central sorkarah special category state nih chhunzawm dilna hi thehlut thei se a thawm pawh a na zawk awm e.

Ram leh hnam tana ṭha turah hi chuan kan political party-te hi vawi tam tak an lo inlungrual tawh a, an ngaihdan ṭhenkhat inkalh mah se ram leh hnam thilah chuan an lo thawkho fo tawh. Tun hi Mizoram dinhmun siam ṭhat theihna hun remchang a nih vangin political party-te hi inlungrual takin kal thei se a duhawm hle a ni.

Zêp thu a chêng lo a, Mizoram sum dinhmun chhiat dan leh tuna kan thlen chin en hi chuan central sorkar duat bik kan nih chhunzawm zel hi a pawimawh a, Mizorama political party zawng zawng hian inlungrualin special category state nihna hi central sorkar-ah ngen thei se a duhawm hle a ni.