8th Schedule-a Mizo ṭawng telh

Mizoram Governor leh Central YMA office bearer-te chu January 27, 2025 khan Raj Bhavan-ah an inkâwm a; CYMA hruaitute chuan Indian Constitution 8th Scheduled-ah Mizo ṭawng telh a nih theih nan hma lakpui turin an ngen.

CYMA hruaitute hian 8th Scheduled-ah Mizo ṭawng telh a nih theihna tura hma an laknaa Prime Minister hnena lehkha an thawn tur chu thehluhsak turin Larsap an ngen nghal bawk.

8th Schedule-a Mizo ṭawng telh duhna leh telh tura hmalakna hi kum tam tak kal tawh aṭang khan buaipui a lo ni tawh a, tun thlengin a la hlawhtling thei lo. Tunah pawh pawl ṭhenkhat chuan an la bawhzui zel a ni.

Mithiam zawkte leh thlir thui zawkte sawi ṭhin danin, 8th Schedule-a Mizo ṭawng telh hi ṭhat lohna eng emaw a lo awm palh a nih pawhin, a ṭhatna a tam zawk hle niin a hriat.

8th Schedule-ah Mizo ṭawng tel ta se, Mizote tan ṭhatna, hlâwkna leh awlsamna tam tak a awm phah dawna sawi a ni ṭhin a; a pawmawm viau. Mizo hnam pumpui leh hma lam hun thui tak thlirin, 8th Schedule-a Mizo ṭawng telh hi a ṭul hle tawh niin a lang.

Tun dinhmun thlirin, 8th Schedule-ah Mizo ṭawng a tel theihna turin ngawrh zawka hmalak zel a ṭul tih a lang reng mai. Páwl hrang hrangte ṭangrualin, tun aia chak leh na zawkin hma la zui zel se, ṭang zel rawh se.

Mizoram sorkar pawhin chak zawka hma a lak a ṭulin a rinawm a, pawl (NGO) hmalakna ai chuan sorkar hmalakna chu a chak nge nge ang. YMA ngenna chhanga Governor-in a bawhzui thei a nih phei chuan awmzia a nei hlein a rinawm. Sorkar hian Mizoram leh Mizo mipui hma huna ṭha zawk tur thlirin chak lehzuala hma a lak a ngai a ni.

Constitution 8th Schedule-a Mizo ṭawng telh a nih theih nan hian sorkar leh pawl hrang hrangte hi tun ai hian han ṭangrual lehzual se, tha thlah loin, theihtawp chhuahin hma han la sauh sauh teh se.