Huaisen takin zirtirtu sem rual ni se

Mizo Students’ Union Gen. Hqrs hruaitute chuan January 28, 2025 khan Chief Minister hnenah zirtirtu, kumin 2025-ah sikul hawn a nih tawh laiin, thawhna hmuna awm ṭha duh lo zirtirtu an awm thu an dawn chungchang te, Mizoram hmun hrang hrangah zirtirtu sem rual a ṭul thu te, sikul eng emaw zat thawm ṭhat a ṭul thute an thlen.

Mi tin mai hi zirna sikula zir tawh deuh vek kan ni a, a ṭhen an thlen thui loh laiin thleng thui tak tak an awm. Zirna leh sikulte hi mi tin nghawng, chhungkaw tin khawih a ni a, a pawimawh tak zet a; a pawimawh êm avang hian ngaih pawimawh em em reng a ṭul.

Nikum Krismas hma deuha sikul chawlh a nih hnuah kumin January 10 khan sikul kai leh ṭan a ni. Chutih laiin, MSU chuan sikul hawn ṭan a nih aṭanga chawlhkar thum dáwnah pawh zirtirtu, an thawhna hmuna la awm lo an awm niin an sawi a; a zialo hle.

Zirtirtu, mahni thawhna hmuna tun thlenga la awm lo an awm tih MSU-in Chief Minister hnena an thlen hi sorkarin ngai pawimawhin bawhzui ngei se, a ṭul angin action la ngei rawh se.

Thil dik lo, ṭha lo leh sualte hi ngaihzam tur a ni lo a, hmeh mih loh chuan a punlun zel a, mi tam takah nghawng ṭha lo a awm zui ṭhin. Zirtirtute an thawhna hmunah an awm ngei theih nan hmalak a ṭul; en liam mai a nih chuan zirtirtu awm ṭha duh lote an huangtau zel phah thei.

Sikul leh zirna-in dangte'n hma an sawn theih nan sorkarin hma a la ṭhin a, mahse, tun dinhmunah chuan sorkar hmalakna tawhnate hi a la tâwk lo niin a lang. Tun aia ṭha zawk leh awmze nei zawka hmalak theih a la ni ang; sorkar leh thuneitute han ṭang zel teh se.

Zirtirtu sem rual te, sikul thawm ṭhatte pawh a pawimawh em em. Thingtlang lam sikulah khaw dang aṭanga thawk zirtirtute an awm ṭhat zawk theih nan sorkarin hma a la a, khaw eng emaw zatah zirtirtute chenna tur in sak a nia sawi a ni; a lawmawm. Thingtlang khaw tam lehzualah quarters sak belh zel theih ni se duhthusam a ni ang.

Zirtirtu sem rual mawlh mai hi tun hma aṭanga buaina leh harsatna a ni. Sorkarin zirtirtu sem rual duhin tum ṭhin mah se, a huaisen tâwk lo ṭhin. Zirna ṭhatna turin sorkar hian huaisen takin zirtirtu sem rual mawlh rawh se.