Aizawl lirthei dinna

Aizawl Municipal Council chuan July 1 aṭangin parking fee sang zawkin an la dawn. Parking fee tihsan chhan hi pawisa lakluh tihpunna lam ringawt ni loin lirthei keng chhuak an tlem phah beiseina a nih tel thu AMC hotute chuan an sawi.

Aizawl khawpuia kawngpuite hi tlang ram kawngpuiah chuan a tê chhe lutuk lo a, kawngpui lûn berte phei hi chu a zahpuiawm lo hle. Nimahsela kawng sir âwl remchang apiangah lirthei kan hung a, kawngpui a len poh leh lirthei kan hung tam emaw tih mai tur a ni.

Tun ang zela kan awm chuan Aizawlah hian lirthei a che hleithei lo mai ang tih hlauhawm khawpin kawngpui hi a tâwt tawh a, thuneitu lamin ruahmanna hrang hrang an siam thar hi thil ṭha zawk an beisei vang a ni ngei ang. Hetihlai hian lirthei neitute'n parking fee a san avanga lirthei an ken chhuah tlem zawk beiseina hi chu thil finthlak ber niin a lang lo a, traffic jam tihziaawm tumnaa lirthei neitute phurrit siam tumna pawh a ang thei a, an rilru put hmang hi a fel tawk lo niin a lang.

Tun hnaiah AMC lamin lirthei hunna an siam danglam a, city bus service chak zawkte siam an tum a, thil ṭha tih tumna leh hmasawn tumna an nei hi a lawmawm hle. He khawpui hian hun rei tak chhung enkawltu a nei lo a, mipuiin an duh duh danin in an sa a, kawngpui nêk deuhte pawh hrem an ni lo a, lirthei hunna pawh mumal taka kalpui a ni lo rei hle.

Tunah AMC-te a lo ding ta bawka khawpui pawhin enkawltu a nei tih a hriat ve ṭan a; amaherawchu hnathawh tur a la tamin rilru sên nasat a la ngai a, huaisen pawh a ṭul hle dawn a ni. Mipui tam zawkte tana hamṭhatna tur a nih chuan lirthei hunna siamrem kawngah huaisen takin ke pen ngam se, zana kawngpuia lirthei riahte phei chu titawp ngam se a ṭha hle.