Pawikhawihna tihtlakhniamna atan hnathawh

Analysis of Arrests by Mizoram Police (September 2023–December 2024)-a tarlan danin, thla 15 kal ta chhungin Mizoramah phal loh thil tia dan bawhchhia mi 3,210 police-te'n an man a; mipa 2,803 (87.3%) leh hmeichhia 407 (12.7%) an ni.

Mi 3,210 an man zinga 1,566 (48.8%) chu kum 18-30 inkar niin, kum 31-40 inkar mi 1,047 (32.6%) an awm. Mi 3,210 man zingah hnathawh nei lo (unemployed) mi 314 (9.8%) an awm a, mi 2,481 (77.3%) chu chhungkaw khawsak harsaa sawi theiha mite an ni.

Mizoram Police report-a bengverh tak pakhat chu pawi khawih vanga man zingah hnathawh nei lo 9.8% lai an awm leh chhungkaw khawsak harsaa mi 77.3% lai an awm hi a ni. Thla 15 kal ta chhunga thil sual tih vanga man zinga 81.4% chu thalai, kum 18-40 inkar an ni a; an zingah khawsak harsa si, hna thawh tur mumal nei si lo tam tak an awm ngei ang.

Khawvelah hian, Mizoramah pawh retheihna hian pawikhawihna chi hrang hrang a keng tel niin a lang. Khawsak harsatna, retheih lutuknate hian pawisak neih lohna a hring thei a, retheih lutuk chuan thil sual tih hreh lohna, rûkrûk duh maina rilrute neih a awlsam bika sawi a ni.

Pawimawh ta chu, retheihna avanga pawi khawihnate a tlakhniam theih nan mi rethei zawkte chawi kân a ni. Chumi tur chuan mihring/mimal an pawimawh ber rualin, sorkarin mawhphurhna sang tak a nei.

Thalai hnathawh tur nei lo tam lutuk (unemployment problem) hi khawvela ram tam tak buaina a ni a, India ram leh Mizoramah pawh buaina pakhat a ni. Inthlan dawnah ram hruaitu nih tumte inzawrhna thina langsar ber zingah unemployment problem chinfel leh thalaite tana hnathawh tur siam tih a tel thin. Thalaite tana hna thawh tur siam leh, thalaite'n hna mumal an neih theihna tura kawng kawhhmuh hi sorkar mawh lian tak a ni tih a lang.

Sorkar hian retheihna ûm bo tur te, thalaite tan hna tam zawk siamsak a nih theihna tur leh hna thawh tur kawhhmuh kawngah tun ai hian tang lehzual se, hmalakna pawh zau zawkin kalpui thei se. Bána Kaih (Handholding) policy hmang leh LESDE department kaltlang pawhin thil tam tak a tih theihin a rinawm.

Chutih rualin, mimal tin hi kan pawimawh ber tho tho. Thalaite hian hna thawh duhna leh tumna rilru kan neih a tul a, thawh hreh neih tam lutuk loh te, thawh theih tâwk hriat leh thawh theih tawka lungawi thiamte a ngai bawk.