Jail thuam ṭhat thuai a ṭul

Myanmar rama Khawmawi nu pakhat chu tun hnai khan Myanmar ram chhunga tualchhung thuneitute'n Khawmawi bulah an man a, January 29, 2025 khan Champhai police hnenah an hlan.

'Ruihhlo Lalnu' ti hiala mi ṭhenkhatin an sawi Khawmawi nu pakhat an man leh tâk hi Myanmar ram aṭanga Mizoram lama ruihhlo (heroin) tawlh lûttu pui ber pakhata sawi a ni. Tuna man a ni leh ta hi a lawmawm a, man a nih theihna tura hma latute an fakawm.

Khawmawi nu hi ruihhlo vangin Mizoramah ṭum li man a ni tawh a, tun ṭum hi man a nih vawi ngana nia sawi a ni. Mizoramah jail aṭangin mi dangte nen tum hnih a lo tlânbo tawh nghe nghe. A tlanbo hmasak zawk, Central Women Jail atanga November 30, 2023-a an tlân chhuah ṭumin bedsheet zawm khawm hmangin jail bangah an uai chhuak a; a tlanbo hnuhnung zawk December 18, 2024-ah Champhai District Jail bang tichhiain an tlân chhuak thung.

Hmeichhe ṭhenkhat inthurual jail atanga an tlân chhuak mai thei hi táng enkawltute leh jail thuneitute fumkhur loh vanga miin an puh a nih pawhin a àwm lo lem lo. Chutih rualin, tlànbo dan tur zawng ngar ngar, a rûka thil ti bawk si chu vèn sèn loh chin pawh awm thei a ni bawk. Eng pawh chu ni se, jail dinhmun leh tángte uluk leh chîk zawka endik leh vil a ngai a ni tih erawh a chiang.

Hmeichhe tlemtêin jail bang an tichhe mai thei phei hi chu a mak hle. Jail thuneitute leh enkawltute tan a mualphothlak mai bakah, Prison department leh sorkar tan pawh mualphothlak a ni thei a; state pum pui tan pawh a zahthlak tel bawk.

Sorkarin Mizorama jail hrang hrangte a thuam ṭhat a ngai hle tih a lang chiang hleah a ngai theih. Jail thenkhat chu sorkarin thuam ṭhat a tum chho mek niin a lang bawk a, chak zawka an bawhzui a, hma an lak thuai thuai a ṭul a ni.

Jail chhung hmun hrang hrang vil uluk a, tángte tlân chhuah theihna remchang a awm leh awm loh zing zawk leh uluk zawka an enfiah ṭhin te, ṭha tâwk lo a awm a nih chuan siam ṭhat vat a nih theih nan hma an lak zung zung a ṭul tih a chiang bawk. Prison, jail enkawltute leh táng vengtute tun aiin ṭang lehzual rawh se.