Ruahmanna neih loh kan tuar a ni em?

Chief minister Lal Thanhawla chuan, sorkar laipuiin state hnena fund a pek chhuahah state tum ve tur chu 10% chiah ni se a duh thu tun hnaia Swachh Bharat Mission hnuaia sub group meeting-ah a sawi chhuak.

Mizoram chief minister-in state dinhmun hre chiang tak chunga a sawi hi keini tan chuan thil sawi âwm tak a ni a, rem phei se state sorkar hian hei aia tlem hi la tum theih ni se a la ṭha lehzual ang. India ram state ṭhenkhatte hi chu state hausa, ram mala ding pawh ni se inchawm zo tur khawpa ei leh bara intodelh an ni a, hmarchhak state ṭhenkhatte hi chu a la pachhe hle a, Mizoram pawh hi kan politician-te ṭawngkam takin 'chawmhlawm state' kan la ni ber.

Central sorkarin sum min pek ṭhin, kan state budget en hi chuan he ram hi kawng eng emaw talah hi chuan intodelh ve thei tawh tur khawpin pawisa hi a dawng ṭhahnem ve tawh a, ruahmanna felfai zawk chu awm se sum hai luhna pawh tun aia ṭha deuh hi chu nei ve thei awm tak a ni. State ṭhenawmte angin kan ram leilung a hausa tawk loin awlsam taka sum lakluhna hlawm lian kan nei lo a nih pawhin, sorkar lam hian ruahmanna ṭha leh fing chu nei se tun ang ema rethei reng tur hi niin kan lang lo.

Mipui cheng zat kan hria a, sum lo lut zat kan hre bawk a, hengte aṭanga teh mai hi chuan khawi lai zawnah emaw hi chuan state hian sum lakluhna rintlak deuhte chu lo siam ve tawh awm a ni a; nimahsela Mizorama sorkarna chelh tawhtute hian ram tana rotling leh sum chang zui thei lam aiin, rei lo te chhunga mawi taka lan tumna leh duhsak zawngte inhaivurna lam hi kan ngaihtuah zawk a ang a, chawmhlawm state kan la ni zui zel hi chu a hahthlakin a zahthlak tawh hle a ni.

Chutihlaiin kan dinhmun en hian zak thei kan ni lo a, chief minister meuh pawhin 10% aia tam sum tum thei kan la nih lohzia a sawi chhuak a; hetiang zela kan kal zui tawh lohna turin sum tam tak kan hmanna NLUP-te pawh hi rintlakah chhuah se, tuna kan kal dan en mai hi chuan kum tam tak hnuah pawh 'chawmhlawm state' kan la ni zui zel ang tih hlauhawm tak a ni.