A takin fai phah ila

PHE leh UD&PA minister Zodintluanga chuan tun hnaiah sorkar laipuia Drinking Water & Sanitation minister Chaudhary Birender Singh chu a pisaah a kâwm a; Union Minister hian Mizorama thianghlimna lama hmalakna turin cheng nuai 1491.75 hû sanction order a lo hlan.

Sorkar laipuiin faina kawngah thapui thawh a tum a, India ram bawlhhlawh tak mai chu fai zawka enkawl a tum a, sum pawh ṭhahnem tak a dah. Swachh Bharat Mission lian tak kal­pui a ni a, National Rural Drinking Water Programme (NRDWP) lam­ah pawh sum ṭha­hnem tham tak dah a ni bawk a, sorkar laipuiin faina kawngah ṭan lak a tum hle.

Tun hma deuhin Mizoramah faina beihpui thlak a ni tawh ṭhin a, sorkarin hmalakna hrang hrang a nei tawh. Heng thilte hian hmun ṭhenkhatah rah ṭha chhuah ve bawk mah se, a mipui nawlpui hian faina leh thianghlimna kawngah hma kan la sawn tawk lo a, a tibawlhhlawhtu nih hreh lo hi a tam zawk an la niin a lang.

Sorkar laipuiin faina beih­puithlakna atan sum ṭhahnem tak a theh chhuak dawn a, Mizoramin a dawn tur pawh a ṭhahnem tham hle. Hei hian mipuite hnenah zirtirna ṭha a takin pe se, faina kawngah awmze neiin ṭan lak ni se; sorkar project lian a nih vanga dan anga ti mai mai loin, Mizoram thenfaina remchang leh Mizo mipuite fai tura inzirna hun ṭha a ni tih hriat a pawimawh khawp mai.

Mizoramah hian sorkar laipui project lian leh ṭha tak tak hian beisei angin nghawng a nei na zui lo fo a, hei hi ṭhahnemngaihna tel loa dan ang maia hnathawh vang a nih a rinawm. Tun hnaia Mizoramin faina beihpuithlakna atana sum a hmuh zozaite hi ruahmanna fel tak nen hman ni se, Mizoramin a fai hlen phah ngeina tura hman zui ni se, hei hi PHE leh UD&PA minister pawh hian chak takin bawhzui rawh se.