Sorkar hnathawk leh KAI application

Chief Minister chuan January 30, 2025-a Power & Electricity department hnathawh leh hmalaknate thlirlêtna a neihpuinaah, a kaihhruai sorkar hnuaiah sorkar hnathawkte fel sawt tura beisei an nih thu te, sorkar hnathawkte hun vawng dik tura an phût thu te, an hnathawhte a ṭha tur a nih thu te, hmasawnna hmel thar hmuh thuai an duh thute a sawi.

Power & Electricity department hotute hmaa CM thusawi hi a pawimawh hle mai a, tihhlawhtlin theih loh a ni lo. CM-in sorkar duh dan a sawite hi tihhlawhtlin a nih theih nan sorkar hnathawkte leh an hotute'n ṭan la zual zel se.

Tun hma aṭang tawhin sorkar hnathawkte'n hun an vawn dik lohzia te, pisa kai huna thleng hman an tlemzia leh tlai an tamzia te, bàn hun hmaa pisa chhuahsan an tamziate sawi a ni ṭhin. Sorkar ṭha nei turin heng hi siam ṭhat a ngaihziate pawh sawi a ni ṭhin.

Pisa kai hun chhung dik taka sorkar hnathawkte'n an vawn theihna tura sorkarin ṭan a la hi a lawmawm. Sorkar hnathawkte pawhin hma an sawn viau tih a lang a, inthlahdah lutuk pawh an tam tawh lo nia sawi a ni a, a lawmawm; duhthusam erawh a la ni lo.

Sorkar hnathawkte a hun taka an thlen a, bàn hun hmaa pisa an chhuahsan lohna tura KAI Application hman a ni ta hi a lawmawm. KAI hi sorkar hnathawk mi dik leh ṭha, a hun taka pisa thleng a, bàn hun hmaa pisa chhuahsan ṭhin lo tan thil hnawksak a ni lo.

Sorkar hnathawk ṭhenkhat chuan KAI app hi hnawk an ti hle nia sawi a ni. KAI hnawksak titute hi chu pisa kai hun vawng dik lo, mi hlemhlête an ni ti ila a sual tam pui lo ang. KAI app hnawksak titu sorkar hnathawkte an inenfiah a ngai.

KAI app hian sorkar hnathawk inthlahdah tur thui tak a vêng ngei a. Chutihrualin, sorkar hnathawk zingah hotute buma tih dan kawng dang zawng duhte pawh an la awm chho mai thei a, an la hmu chhuak mai thei bawk. Sorkar hotute an fimkhur a, an vil zui ṭhat zel a ngai dawn. Tun thlenga KAI la hmang lo an awm a nih phei chuan a rang thei ang bera an hman theih nan bawhzui a ṭul ang.