Ram tana hlawk turin privatisation

Food Civil Supplies & Consumer Affairs (FCS&CA) department chuan private supplier hnen aṭanga buhfai an lei hnuah kum khatah cheng vaibelchhe 5 chuang an hlêp thei dawn niin an chhût.

Mizoramah hian kan kaldan phung pangngai thlak hi harsa kan ti a, thil ṭha zawk ngaihtuah chhuak an awm pawhin zawm harsa kan ti ṭhin a, kan lo hriat ṭhan tawh tihdanglam hi kan hreh tlat ṭhin. Sorkar meuh pawh hian kaldan ṭha zawk a hriat hi a zawm ngam mang lo a, thil tam takah privatisation kalpui hi a ṭha zawk tih an hre chungin an kalpui ngam lo a ang ṭhin.

Tunah chhan hrang hrang avangin sorkar chuan private supplier hnen aṭangin buhfai a lei a ngai ta a, tuna an thlen chinah chuan lawmna tur a tam hle. Sorkarin pawisa thawhchhuah a harsat laia buhfai supply aṭanga kum khata cheng vaibelchhe 5 chuang hum theihna tur a nih tak tak chuan thil lawmawm tak a ni.

Tun hnaia sorkarin Tourist Lodge ṭhenkhat a privatised-te kha thil lawmawm tak a ni a, sorkarin hloh zela a kalpui hi mimal ṭhahnemngai zawk leh a ngaihna hria chuan a hlawkpui thei ang. Sorkar thil a nih tawh chuan a thawktu tam tak hian ṭhahnemngaihna nen an thawk lo a, an hlawh nen a inzawm loh avangin hmasawn tumna tak tak an nei ṭhin lo.

Sorkarin private supplier hnen aṭanga buhfai a lei hi inzirna atan hmang se, thil ṭhenkhat hi chu privatise ni se ram tan a ṭha zawk ngei ang tih a rin theih a; tute emaw a tuartu awm dawn mah se, mipui tam zawk leh ram tana ṭha turah chuan sorkar hian privatisation hi kalpui ngam rawh se.