Lirthei chetsualna leh thihna tihtlem

Kumin February thla chhung awh tur Road Safety Month chu February 1 khan hawn a ni a, thupui chu 'Fimkhur leh him takin lirthei khalh ṭhin ang che' tih a ni. Month hman chhungin lirthei chetsualna a tlem theih nan uar zawkin inzirtirna buatsaih a ni dawn a; lirthei khalhtute leh lirthei endik bakah, lirthei kaihhnawih dan hrang hrang leh fimkhurna turte a tam thei ang ber inzirtir tum a ni.

Road Safety Month hawnnaa Transport Secretary tarlan danin, Mizoramah kum 2019-2023 chhungin lirtheia chetsualna vawi 423 thleng a, chutah chuan mi 355 an thi. Lirtheia chetsualna thleng zinga 68.32% chu fimkhur loh vang niin, chungah chuan mi 253 an thi a ni.

Rùi chunga lirthei khalh vanga chetsualna ṭum 85-ah mi 69 an thi a, wrong side-a tlân vanga chetsualna vawi 44-ah mi 28 thiin, phone hmang chunga lirthei khalh vanga chetsualna vawi ngaah mi panga an thi bawk.

Lirthei han khalh chiah hian chapona rilru a awm ve nghal a ni mai thei; lirthei khalhtu zingah tlawmngai zawk nih tum leh intawh chánga hnung tawlh (back) zawka ṭan tum lo tlat an awm ṭhin a, hei hian mi dangte tan harsatna a thlen fo. A ṭul a nih a, tawlh remchang zawk kan nih chuan hnung tawlha insiamrem zawk nih kan hreh loh tlan a pawimawh.

Kan kawngpui tam tak hi a zauh tâwk loh avangin lirthei khalhtute'n hawihhâwmna an neih a pawimawh. Buaina leh harsatna thleng ṭhin tam tak hi hawihhâwmna hmanga chinfel theih a ni tih kan hriat a ṭha.

Mizoramah fimkhur loh vanga lirtheia chetsualna a tam ber avangin lirthei khalhtute inenfiahna ṭheuh a ngai. Lirthei khalhtute fimkhur loh leh inthlahdah vanga mi tam takin an thih phah hi a pawi tak zet a; lirthei khalhtute hian kan nunna bakah, mi dang nunna kan kutah a innghat a ni tih hriaa fimkhur lehzuala lirthei kan khalh ṭheuh a ṭul a ni.

Lirthei kaihhnawih dante hi lirthei khalhtute leh mi dangte himna tura siam vek a ni a; lirthei chetsualna leh chumi vanga thihna titlem turin dan zawm mai a pawimawh a, mi tin tih tur a ni.