Zirna inah politician

Higher & Technical Education department chuan thupek chhuahin, zirtirtute chu an subject kaihhnawiha thusawi tura politician-te sawm tawh lo tura tih an ni. Zirlaite hmakhaw ngaia tih anga ngaih theih a nihlaiin zirlaite kawng dik loa hruai thei leh harsatna siam thei a ni, an ti.

Tun hnaiah college ṭhenkhatin an zirna ina thusawi turin politician-te an sawm a, zirna lamah kawng khatin hma kan sawn ve ṭan emaw tihlaiin sorkar chuan a khap leh ta. Khawvel hmun dangah chuan zirna inah hian politician-te hian sawm an hlawh a, politician ni kher lo mi bik dangte pawh sawm an ni ṭhin.

Zirlaite hian an zirlaibu pawn lamah inzirna tur tam tak an nei a, heng mite hnen aṭang hian zirlaibua inziak lo thil tam tak an zir chhuak ṭhin. Hetianga zirlai leh sawm bikte inkawmna hun hi uar deuh deuh ni se a ṭhat tehlul nen, Higher & Technical Education department chuan a khap ta mai a, ngaihtuah chian a ngai khawp mai.

He thil lo chhuah dan chiah hi hriat ni lo mah se, politician an sawm zingah hian ruling party lam aiin opposition party lam an tam zawk vang pawh a ni mai thei e. Zirlaite hi mi mawl an ni lo a, chhia leh ṭha hriatna nei vek an ni a, tute emaw thusawi avanga nghing dual dual tur pawh an ni lo. Zirlaite hian politician tawnhriat ngahte hi kawmin zawhnate zawt se, chumi hnuah anmahniin ngaihdan an siam ve mai dawn a, enga mah hmaa a politician sawm lam lo khap ngawt hi chu kan thlirna a zau tawk lo a ang hle.

Zirna in hi po-litics-a vote zawnna hmun a ni lo a, poli-tician pangngai chin chuan anmahni leh an political party chanchin an sawi piah lamah chuan zirlaite anmahni vote ngei tura sawmna an siam duhin a rinawm lo. Politics-a campaign-na hmunah an chan pawh ni lo a, zirna ina politician sawm khap ringawt mai hian zirna kan kalpui dan a hril chiang hle a ni. Zirlaibu pawn lama zir belh tur tam tak hi mi tawnhriat ngahte kal tlanga zir theih a ni a, chu chu zirlaite pawhin an hriat chak tur a ni; politician an ni emaw, eng ti mi pawh ni se, zirlaite nuna fuihtu leh hriatna belhchhah theitu tur chu sawm zel ila, rilru zau takin Higher & Technical Education department hian ngaihtuahna seng rawh se.