Statistic dik neih a ngai e
Statistic Day chu India ram hmun dangte angin tun hnai khan Mizoramah pawh hman a ni a, Economic and Statistics minister Lalsawta chuan, department-a hnathawktute chu statistics dik leh rintlak vawng turin a chah a, a dik chiah loa chhinchhiah loa 'a chiah chiah' chhinchhiah ṭhin turin a hrilh bawk.
Mizoramah hian sorkar meuh pawhin statistics rintlak lo a neih chang a awm ṭhin a, hei hian harsatna tam tak a thlen. Sorkar aṭanga pian kum pek chhuahte, sorkar aṭanga sum lakluh zat chhinchhiahna (income certificate) bakah sorkar-in mimal thil a kawlte hi a dik lo a tam hle a; hei mai hi ni loin sorkarin ram pum huap thil a chhinchhiahte thlengin a dik lo a awm ṭhin.
Thil tibuaithlak zo ṭhin chu sorkar department hrang hrang thil chhinchhiah dan inang lote hi a ni a, mihring awm zatte leh chhungkaw awm zatte thlengin a chhinchhiahtu department azirin a danglam ṭhin. Sorkar department ṭhenkhat thil chhinchhiah dan fel lo hi chu 'tihpalh' lam aiin 'tihluih' a ang zawk a, an department-in hamṭhatna an hmuh theihna tur, sum tam zawk an lakluh theihna tur lam hawi a ni deuh zel.
Khawilaiah emaw mimal thil chhinchhiah dan fel lo a lo awm a nih pawhin, sorkar meuhin ram pum huap thil a chhinchhiah leh ziah luh chin hi chu inang tlang thei se a ṭha khawp mai a, sorkar pawh hemi kawngah hian a ṭan a ngai hle a ni.
Economic and Statistics minister sawi angin sorkar department ṭhenkhatin an lo chhinchhiah fel lo a nih pawhin Economic and Statistics minister department tal hi chuan felfai takin a dik thlapin thil chhinchhiah se, ram hmasawnna tehna tur leh hnathawhna turah pawh statistics dik neih hi thil pawimawh leh ṭul tak a ni si a.