VC/LC thlan turah fimkhur ila

Mizoramah village council leh local council thlang turin inbuatsaihna a kal mek a, political party hrang hrangte ngawrh takin an inbuatsaih mek zel. Hetih lai hian, VC tihtawina thupek All Mizoram VC Association (AMVCA) President-in High Court-ah a khing mek bawk.

VC leh LC inthlan hi SEC chuan February 12, 2025-a neih turin a ruahman a, inthlan hmain chawlhkar khat a la awm. Political party-te leh candidate-te nasa takin an inbuatsaih a, heng karah hian mipui lamin rilru fîm tak kan put chhoh a pawimawh.

VC term kal mek tihtawpna thupek High Court-ah khin a nih avangin Court thutlukna mipuiin an ngaichâng mek. AMVCA President-in a khin ber chu VC term tihtawina thupek niin a lang a, VC/LC inthlan tur erawh a khing tel lo niin a lang. Hei vang hian High Court-in VC term tihtawina order a lo ṭhiat ta a nih pawhin, VC leh LC thlanna erawh kaltlangpui tho tur ni àwm tak a ni.

VC/LC thlan dawn apiangin state sorkara rorel lai party apiangin an thawhpui theih tur, ruling party candidate-te thlang chhuak turin mipui an chah ṭhin; eptu party lamin VC/LC-ah state sorkara rorel lai party candidate-te kher thlan a ṭul loh thu an sawi ṭhin thung. Hemi chungchangah hi chuan a sawitu ngai reng pawh ni se, sorkar lai party an nih leh nih loh azirin an sawi dan a danglam mai niin a lang.

Political party hotute zingah inthlana an chak theihna a nih dawn phawt chuan thu dik tâwk lo sawi mai hreh lo an awm ṭhin niin a lang a; mipui tan fimkhur hle a pawimawh.

Party hrang hrangte leh VC/LC candidate tam tak chuan an tlin theihna turin hmanrua leh tih dan chi hrang hrang an hmang zel dawn. An thil tih leh sawite chu tih theih a nih leh nih loh te, thu dik a nih leh nih lohte mipuiin kan chîk a ṭul. Mi dik, mi ṭha, khawtlang tana ṭhahnemngai taka thawk thei ngei tur kan thlan chhuah theih nan uluk leh fimkhur taka vote kan thlak ṭheuh a ngai a ni.