Remna Ni inrem phah i tum ang

MNF leh India sorkarin inrem­na thuthlung Memorandum of Settlement an ziahna champha, 'Remna Ni' chu tun hnai khan political party-te'n hmun hrang hrangah an hmang.

Reamna Ni hian lawm a hlawh vak loh kumte awm bawk mah se, kumin chu political party pathumin an lawm a, party president ṭheuhin thu an sawi. Political party lam chu he Remna Ni hi Mizote tana ni chhinchhiahtlak leh lawmawm a ni tihah an inlungrual thei vek a; nimahsela Remna Ni atana thawhhlawk ber nih tum ang deuhin an tih tamzia lam sawi nuam an ti ṭheuh bawk.

Ream Ni anga ni pawimawh hi khawvel hmun dangah pawh an nei ṭheuh a, dan naranin heng ni pawimawhte hi lungrual taka hman tlan theih a ni ṭhin. Mizorama kan political party-te sukthlek en hi chuan Remna Ni hi inremna niah an hmang zui lo tih a chiang a, mahni insawi lenna hun remchang leh midangte tihtêt tumnaah an chhuah deuh vek niin a lang a, a zia lo hle a ni.

Political party-te chu ngaih­dan inang lo, tum leh kalphung pawh inang lo an ni a, an inhnialin che ṭha zawk nih an tum ngei tur a ni a; nimahsela history-a chuang reng tawh tur thil kal tawh kan sawi duh dan a inang lo tlat mai hi a zia lo ngawt mai. Remna a thleng tawh a, a thlen dan leh a thlen chhante pawh mi pangngai chin hi chuan an hrethiam a, chutihlaia mahni insawi ropuina ni ang deuha political party lamin an hmang duh hi chu mipui zah lohna ang hialah a ngaih theih.

Remna Ni hi kan la hmang zui zel dawn a, political party-te hian mahni party hamṭhatna ûma a hranga hmante pawh hi titawp se, sorkar lai apiangin kaihruai se inrem zuina niah hmang thei ila a ṭha khawp mai. Tun anga kan kal zel a, Remna Ni bera inrem lohna thu hlir kan sawi chhuah chuan ṭhangtharte nuih kan tiza palh ang tihte pawh a hlauhawm ta hial a ni.