Sikul naupang tlu

Aizawl DC hoa Inde-pendence Day 2016 hman dan thlirlettute chuan, inkhawm (function) neih laia sikul naupangte an tlûk tawh lohna atan hmalak ni se, an ti. National day lawm leh hunah sikul naupangte pum ruak rilṭáma an awm lohna turin parade hmain ei tur pek ni se, tiin an rel.

Tun hma aṭangin national day-ah zirlaite leh sipaite an parage ṭhin a, zirlai tlu hi chu an awm pheuh pheuh ṭhin a, thil thar a ni lo. Kumin Independence Day lawmna Lammuala neihah erawh kum dang zawng aiin zirlai tlu an tam a, sawi zui pawh a hlawh reng a ni.

Kum dang aiin an parade chhung a rei bik a ni lo a, thusawi a rei bik pawh a ni lo a, khaw lum dan pawh kum dang aia lum uchuak a ni hran lo a, chuti chung chuan kum dang aiin zirlai tlu an tam a, a chhan chhui chian a ṭha ngawt mai.

Chhan hrang hrang awm thei zingah zingkara pum ruaka an parade vang te, khaw lum avang te, taksa chauh hrim hrim avangte pawh a ni thei. Titiah chuan zirlai zingah gutkha product ti an tam a, hengte hi an taksa a ti chak lo a, a chhan pakhat ni theia ringtu pawh an awm. Hei bakah hian Lammualah hian artificial grass phah a ni a, a grass hi a kawlh deuh vek tawh a, a chhunga an phum rubber pellet a lo chhuak nasa tawh a, hengte ni sain a em hian che loa ding reng maite tan hian harsatna a thlen palh thei em ni, tihte thlengin a ngaihtuah theih. Mi thiam zawkin a chhan zawn chhuah a ṭha a, thlir liam ringawt chi a ni lo.

A pawimawh ber chu parade-a telte hi khuallian thusawi laia ding reng tura kan tih hian an zo lo a nih hmel a, ṭhu hahdam chunga thusawi an ngaihthlakte pawh phalsak mai se, zirlaite hi national parade-a an tel zui zel dawn a nih chuan an tana harsatna thleng lo zawnga ruahmanna siam hi a ṭha awm e.