Kuhva tawlhrûk titawp tura ṭan rual

6th February, 2025

Home Minister chuan February 3, 2025 an party pisaa thu a sawiah, tun hnaiah ram dang kuhva tawlhrûk chíngte an huangtau thar deuh tih thâwm a awm thu te, khaw tam takah tlawmngai pawl leh VC-te'n sorkar puia tlaivara duty-te an awm laiin, khaw ṭhenkhatah chuan VC-te'n kuhva tawlh rutute an ṭanpui zawk nia an hriat thute a sawi.

Minister hian kuhva tawlhruk titawp tura hmalaknaah police-te duty-na kawngpui bik chu an ven hneh laiin, police-te'n an vên phâk loh kawng rûkah an tlân thu leh, kawngpui pangngai hêlna kawng rûk 28 hmuh chhuah a nih thu a sawi a ni.

Khaw ṭhenkhatah VC-te'n ram dang kuhva tawlh rutute an ṭanpui nia sawi hi Home Minister sawi a ni a, a dik turah ngai ila. Sorkar leh ram mipuiin an duh loh, dan loa chêtna, kuhva tawlh rutute ṭanpui duh VC an awm hi a zialo tak zet a; sim hmak teh se.

Kuhva tawlhrûk hian nghawng ṭha lo tam tak a nei a ni tih mipui náwlpui hian kan ngaihtuah thlen a ngai. Dan loa thil tih hmangin sum thianghlim lo tam tham tak an la lut ṭhin a, chu chuan Mizoramah thil man, a bikin in hmun (ram) man a to phah hlea sawi a ni. Mizo khawtlang nun a chhiat phah nia sawi a ni bawk.

Kuhva tawlhrûk chungchangah police-te kut phuar duhtu, smuggler-ho hi mit siai khum duhtu, chutiang tura ngam huai tak tak an awm nia sawi a ni. Sorkar hotu te, police-te leh khawtlang hruaitute an fimkhur a, thamna sum la lo tura din ngheh a ṭul hle ang.

Ram dang kuhva tawlhrûk hi namnûl leh ngaihzam chi a ni lo a, kuhva tawlh rutute an huangtau thar leha sawi hi hmeh mih thuai a ngai a; sorkar, pawl leh mipui ṭanrual a ṭul.

Kuhva tawlhrûk tihtawp a nih theih nan sorkarin nasa lehzualin ṭan la thar se, kawng rûk hmuh chhuahte pawh smuggler-te'n an hman ṭangkai tawh loh nan uluk zawka vên ni se.

Hetih lai hian, YMA, Kawlkulh Group chuan February 3, 2025 khan thuchhuah an siam a, an huam chhunga kawngpui hrang hrangah dan loa kuhva phur lirtheite tlân an remtih loh thu an puang. He an thuchhuak hi zâwm duh loa tlân luih tum an la awmin a rinawm a, a ṭul angin bawhzui se a duhawm.