Buhfai supply

Mizoram sorkarin buhfai supply tura MIZOFED a thlan dan chu mi ṭhenkhat lungawi loin Gauhati High Court-ah an khing a, High Court chuan Mizoram sorkar leh MIZOFED-te chu August 31, 2016 ral hmaa Court-a insawifiah turin a hriattir. Hetih lai hian, MIZOFED chuan sorkarah buhfai quintal 30,000 a supply tawh.

Mizoram sorkar hian open market-a buhfai supply tur thlanna atan April 9, 2016-ah tender thar a chhuah a; tender chhuah siin tender chhángtu zinga mi thlang loin, MIZOFED hnenah supply order a pek avangin, tender chhangtu zinga lungawi lo mi 10 vel intêl khawm chuan sorkar thil tih dan chu High Court, Mizoram Bench-ah an khing ta a ni.

Buhfai supply tur hian sum leh pai ṭhahnem tak neih hmasak a ngai a, a hna hi a hautak em avangin mi rintlak deuh hnenah an pe ngei tur a ni. Sorkar hian a chhangtu thlang loa a chhang lotu lam a thlang daih a nih chuan thil mak tak a ni reng a, a chhangtu zinga mi a hmu ta lote an lungawi lo pawh hi a awm reng a ni.

Sorkar hian buhfai supply hi mimal kutah a lo pe tawh a, a supply ṭhain a man pawh a tlawm a, sorkarin sum tam tak a hum phah niin sawi a ni hman a; nimahsela rei tak kalpui erawh an thei ta lo a, sorkar hian tender thar a chhuah leh ta a ni. Tender thar chhuaha a chhangtu lam thlang lo a, MIZOFED an thlang ta daih hi sorkar hian a chhan chiang tak an puanchhuah a ngai a, mipui hnenah thil awm dan an hrilhfiah a ngai a ni.

MIZOFED hi an rintlak lo emaw, an fel lo emaw lam ni loin, tender chhuah na na na a chhang lotu an thlang daih hi chu thil remchang lo tak a ni a, Mizoram mipui hriatah sorkar hian thil awm dan a tihchian a ngai. Tunah chuan court-ah thu a awm tawh a, court thu ang zela kal a ngai tawh a, mipui lamin thil kal zel dan ngun takin an lo thlir reng dawn a ni.