Doctor zahawmna kengtu chu doctor

Indian Medical Association (IMA) Mizoram State Branch chuan tun hnai khan India ram hmun dangte rualin Doctors' Day an hmang a, blood bank tinah thisen an pe. IMA Mizoram State Branch hotute chuan press mite kawmin doctor-te inrelbawl dan hrang hrang an sawifiah a, doctor che mawi lo an awma an inzilh fo thute an sawi rualin a ṭul hunah an thlavang an inhauhsak tawn tih an sawi bawk.

Khawvela eizawn­na zahawm ber pawl chu doctor hna hi a ni. He hna zahawm tak hi hna hautak tak a ni a, hna pawimawh ber zinga mi a ni bawk. He hna hi mi naran thawh theih a ni lo a, zirna lama mi thiam bik chin chiahin an zir theih a ni a; zir chhuaha a degree hmanga hnathawh theih a ni lo a, thiamna hmanga hnathawh zui ngai a ni. A zirlaiin a hautakin a hahthlak a, zir chhuaha hnathawh hnuah pawh dawngdah tak leh âwlthawng taka thawh theih a ni lo a, a hautak zui zel a ni.

Hengte avang hian doctor-te hian zah an phû a, kan mang­anlai bera kan belhte an nih avang ngawt pawh hian an ngaihsanawm. Mihringin kan dinhmun harsa leh chhe lai berah doctor kan hre chhuak a, kan innghahna an ni a, vawi tam tak nun chhanhimtu an ni. Hetihlai hian an tihsual neih chhunte hi a langsar a, mihring thihna khawp hial thlen thei a nih avangin an fimkhur pawh a ngai hle.

Doctor hna, hna zahawm chungchuang ni ṭhin hi tun hnaiah tute emaw khawsak danin a zir loh avangin sumdawnna leh sum siamna ang maia a tlangthan changte a awm a, a pawi hle a ni. Mi tinin sum kan mamawh ṭheuh a, thiamna neia hnathawktu chuan a thawh hah man hlawh a hmu ngei tur a ni a, doctor an nih vanga sum an zawn hi a thiang lo bik lo a; nimahsela mipui hian 'doctor tihâwm reng' nia ngaih chin hi an nei a, hei hi chu pelh loh a ṭha. Phai lama doctor ṭhenkhatte anga a ṭul lo thleng thlenga damdawi chawh leh test turte chawh ching ve lo tur leh, Mizo damlote an en danah Mizo rilru leh Kristian rilru pu turin mipui lam chuan an beisei tel tlat ṭhin.

Doctor hna hi eizawnna zahawm ber pawl a ni a, a zahawm chhunzawm zelna hi chu doctor-te kutah a awm a; doctor-in sum a hai luh dan leh a hna a thawh dan aṭangin an zahawmna hi mipuiin an teh zel dawn a ni.