Aikal lak

Land Revenue & Settlement (LRS) department chuan, an department-a aikal la ṭhinte chu anmahni ngeiin an hna an zawm loh chuan anmahni thua inbàn anga ngaih an nih tur thu an hriattir.

LRS department hian an department inrelbawlna a lo fel theih zawkna turin aikal late chu September 1, 2016 aṭanga anmahni ngeiin an hna zawm tawh tura hriattir an ni a, hna an zawm loh chuan anmahni thua inbân an nih tur thu a hrilh nghal. LRS hian an ti ṭha kan tih theih rualin mahni mawng an hlim pawh a ni thei a; nimahsela an ṭha tawk lo a ni tih pawma huaisen taka insiam
ṭhat an tum ngam hi an fakawm khawp mai.

Mizoramah hian sorkarin aikal lak an phal loh thu an sawi ve fo a; nimahsela sorkar department tih deuhthawhah hian aikal an la awm. Aikal lak hi a pawi tih pawh hre mang lo khawpa lo
tiṭhang tawh thlengin an awm a, hei hi dan kalh a ni.

Sorkar hnathawk ni si, mahni hna pawh thawk loa midang thawhtir a, hna dang leh thil danga inhmangte hi chu sorkar hian na takin action la ngam se, a ṭul a nih chuan an hna aṭangin ban hial se a ṭha. Mizoramah lehkhathiam hna nei lo mi ṭhahnem tak, sorkarin hnathawktu thar a lak hun nghak-hlel em em an awm a, heng mite zah vang tal pawh hian sorkar hnathawktu chuan a hna ṭha takin thawk mai rawh se.

Aikal lak pawh titawp thei lo sorkar kan nei reng maite hi a tlawmthlak a, mi hrem thei dinhmuna dingten an hnuaia hnathawk aikal late an hrem ṭhin lo hi chu a mak hle a ni. Sorkar hi a hnathawkte enkawltu a nih piah lamah a hunah chuan a hnathawkte zilh a, thununtu a ni tel tur a ni a, Mizoramah sorkar hnathawk aikal lak hi tihbo ni tawh rawh se.