Garage

Home minister R Lalzirliana chuan, Aizawl khawpuia traffic tâwt tihziaawmna atan lirtheite garage-a dah tura tih thupek chu khauh zawk kenkawh a nih tur thu a sawi. Main road-a lirthei dahte phei chu pawisa chawitir zel an tum a, khauh zawka dan lek kawh tumin an inbuatsaih.

Mizorama thil buaithlak tak chu dan kenkawh a ni lo ṭhin hi a ni. Tun hnaiah lirthei register thar zawng zawngin garage an nei tur a ni, tih ni mah se, a taka garage nei lo tam tak chu sorkar thoin a ziak lut leh si. Hengte hi sorkar lam inrelbawl fel loh vang a ni a, sorkarin ama thupek chhuah ngei pawh a kengkawng zo ṭhin lo.

Home minister thusawi hi ngun taka kan zir chuan, thil thar a sawi lo a, 'thupek kan kenkawh zawh loh kha kenkawh kan tum ve ta e,' a tihna ang lek a ni. Hetihlai hian tlawma lak chi a ni lo a, sorkarin a thupek chhuah tawh, lirthei neite garage nei vek tura a tihna chu a takin bawhzui a tum ve ta tihna a ni a, thil lawmawm lam a ni.

Aizawlah hian kawngpuia lirthei riah phal loh thupek hi khauh taka chhuah ni se, thla thum emaw hun inpek ni bawk se, lirthei dahna hi an zawng hmu vekin a rinawm. Local Council ṭhenkhatin an huam chhungah kawngpuia lirthei dah an khap a, veng tam takah zana kawngpuia lirthei dah loin an awm thei. Sorkar hi huai taka a ṭan ve ngam a ngai a ni.

Garage nei ngang lo tan zan riahna tur hi khawpui daiah siam ni se, dah man siam ni bawk se, hemi hmang hian garage nei lote buaina hi chinfel theih a niha rinawm. Aizawl khawpuia lirthei dahna tu nei lote hi hun bituk chhunga lirthei dahna nei vek tura tih ni se, a nei lote chu ngaihnatthiamna awm loin sorkarin action la zui ngam se, harsatna tam tak hi sut kian a ni thei ang.