Garage neih ngei ngaiah khauh a ṭul

'Mizoram Vehicle Statistics - Number of Vehicles Registered (on road) in Mizoram' tarlan danin, Mizoramah April 1, 2020 aṭanga January 31, 2025 inkarah lirthei 1,19,895-in a pung. Lirthei ziah luh zinga a zatve aia tam fé, 85,442 chu two wheeler a ni a, lirthei ziah luh zawng zawng aṭangin 71.26% a tling.

Mizoramah lirthei a pung chak hle tih a chiang a, kan hre tlang a. Ram mipuiin sum leh pai an neih tâk vang leh chhungkaw dinhmun a lo ṭhat tâk vang te, lirthei neih ve ngei ṭul tihna vangte leh chhan dang vangte a ni thei ang.

Khawpuiah phei chuan chhungkaw tinin two wheeler emaw tal an kawl emaw tih mai tur a ni tawh a, thingtlang lamah pawh lirthei a tam tawh hle a, fehna atana lirthei hmang pawh an tam tawh hle. Heng zawng zawng hi thil lawmawm lam a ni.

Hetih lai hian, kum eng emaw ti kal ta aṭang khan sorkara lirthei ziak lut thar turin vantlang kawngpui ni loa lirthei dahna bik (garage) neih ngei a ngai a, garage nei ngei tih hriatpuina lehkha khawtlang hruaitute aṭangin neih a ngai.

Zan lamah Aizawla tlangdung kawngpui (main road) leh veng pènhleh deuha kawngpuite hi han en ila, kawngpui sira lirthei dah (riah) hmuh tur a tam hle. Zana kawngpui sira lirthei riah ṭhinte hian garage nei tak tak si loin sorkarah chuan garage an nei a ni tih tichiangtu document an nei ngei a nih a rinawm. Dik lo taka thil ti, sorkar official-te bum ṭhin mi tam tak an awm niin a lang.

Sorkara lirthei ziak lut thar tura garage neih ngei ngai hi khauh lehzuala kenkawh ni se a duhawm. Chutiang tur chuan sorkara mawhphurtute an fimkhur lehzual a ngai a; dan leh thupekte a nihna ang takin kengkawh rawh se.

Khawtlang hruaitu, miin garage a nei a ni tih hriatpuina ziaktute pawhin dik taka thil an tih a ngai a; lirthei dahna tur nei lo na nâ nâ chu hriatpuina an pek loh ngam a ṭul. Lirthei nei tharte leh neih thar tumte pawhin dik taka an tih a ngai a, thuneitute dâwta bum lo tura rinawm a ṭul a ni.