Rel kawng

Governor Lt. Gen. Nirbhay Sharma chuan, tun hnai khan Raj Bhavan-ah North East Frontier Railways hotute koin, Sairanga rêl chawlhhmun siam dan tur leh rél kawng siam mek a sawipui. Ramngaw tichereu lo tur leh tualchhung mite rilru mil zawnga rel chawlhhmun siam a ṭhat ber thu a hrilh a, railway chawlhhmun tur design competition siam a, Mizorama architech leh engineer-te sáwm turin a chah.

Mizoramah rel a lo lut dawn a, tunah hian a kawng siam hna pawh chak taka kalpui mek a ni. Rel lo lut tur hian sawi a hlawh a, mi ṭhenkhatin hmasawnna anga an hmuh hi ṭhen-khatin an lo hlauthawng a, inchimralna inṭanna tur ang hialah an ngai. Engpawhnise tunah chuan rel lo luh kan duh leh duh loh lam sawi a hun tawh lo a, rel lo lut tur lo dawnsawn dan tur inzirtir hi a ṭul tawh zawk a ni.

Larsap hian thil awm dan thui takin a thlir thiam a, rel kawng siam a nih hian khawi hmunah emaw an lo tih tawh dan ang ringawta kal a remchang lo a, rel chawlhhmunte pawh siam a ni dawn a, state danga an lo tih tawh dan zawm ve mai hi a rem loh dan a awm ang. Mizoram mila siam, Mizo mipuite tana ṭangkai tur leh an chhawr theih dan turte thlengin ngaihtuah tel se, kan ram tana ṭha ber tur zawnga her thiam hi a pawimawh hle a ni.

Rel kawng siam hna kalpui mekah hian thil dang ang bawkin zangnadawmna chungchangah inhnialna leh sawi neuh neuh a awm a, rel kawng buaipuitu lamin ram an lo nei tel zelte hi chu a ngaihṭhat thlak loh takzet a ni.

Engpawhnise rel kawng siam hna kalpui mek a ni a, nakin lawkah Mizoram khawpui ber Aizawl bul hnaiah rel a lo lut dawn a, chumi dawngsawng tur chuan kan rilru siam fel ila, rel kawng siamlai aṭanga inbuatsaih hi a finthlak hle a ni.