Inṭhian ṭhatna tura hun hmanho

Kolasib district leh Assam-a Cachar district-a sorkar hotute chu February 6, 2025 khan Cachar DC conference hall-ah an inkâwm a; ramri hnaiha chengte'n harsatna an tawh loh nan minister level-a inbiaknaa thu dah vawng chungin thawh dun zel dan tur an sawiho. Hun remchang hmasaah Kolasib-ah inkawm leh an tum bawk.

Mizoram leh Assam state chhunga ramri dep district pahniha sorkar official-te'n state pahnih inkara harsatna awm theite ven dan tur te, hmalakho dan tur leh inṭhian ṭhatna tura an inkâwm hi a lawmawm a, tun hma pawhin neih a lo ni tawh ṭhin. Inkawmhona hian rah ṭha tak chhuah ngei se a duhawm.

Tun hma aṭangin state pahnih inkarah inṭhian ṭhatna turin cultural programme te, inkhelhhona hunte buatsaih a lo ni tawh ṭhin. Thil ṭha a ni. Inṭhian ṭhatna tura hun hmanho hi a remchan dan angin uar zawka tih zui zel theih ni se a duhawm; thil tihho tam tam hian rah ṭha a chhuah ṭhin.

State pahnih inkarah inunauna leh inṭhian ṭhatna tura hmalak ṭhin a nih rual hian, ramri-ah ngaihdan a inan loh miau avangin buaina a chhuak fo tawh a, buaina a la chhuak leh ṭhin mai thei bawk.

Mizoram-Assam ramri buai hi chinfel tuma hmalak ni tawh ṭhin mah se, tun thlengin chinfel a la ni lo a; chinfel harsa tak a ni. Chinfel harsa tak a ni chung hian thil theih loh erawh a ni lo ang a, chingfel tura hmalak zui zel erawh a ṭul.

Ramri buai chingfel tur hian state pahnihte'n hloh ṭhen chin leh hlêp chin kan neih ve ve a ṭul ang. Hei hi sorkar hotute mai bakah, Mizoram mipui pawhin kan hriat a ngai. Kan ram china kan ngaih ve ve kan pawm bur a, kan tawlh duh lo ve ve a nih chuan ramri buai hi chinfel a harsa dawn a, thil theih loh a ni hial mai thei.

Mizoram-Assam ramri buai chingfel tur hian sorkar hian chak zawkin hma la se la, March 31, 2025 hmaa minister level-a inbiakna neih leh tura thu lo dah tawh pawh a hlawhtlin ngei theih nan bawhzui ni rawh se.