Inthlahdahte hum loh a ṭul

Health department leh Social Welfare & Tribal Affairs department hnathawh leh hmalaknate February 6, 2025-a thlirlêtnaah Chief Minister-in damdawi-inah chetsualna leh vanduainate a thlenin chincháng dik tak mipui hrilhfiah ran a ṭhat thu a sawi a; thil tisual an awm chuan dan anga hmalak hreh lo turin a chah.

Health department hi an pawimawh em em a, mi tin, chhungkaw tin khawih department a ni. Ram leh hnam tan thil ṭha tak tak an ti tawh a, mi tam tak damna an lo thlen tawh.

Ram tan thil ṭha tam tak an tih tawh karah inthlahdah vang ni ngeia ngaih theih chetsualna pawh a thleng zauh zauh tawh. Ṭhenkhat chu thil tênau deuha ngaih theih a nih laiin, pawi lian tham, thihna hial pawh a thleng tawh ṭhin bawk. Kuminah ngei pawh damdawi-in pakhatah chuan inthlahdah vang nia ngaih theihin thihna hial a thleng a ni.

Chief Minister-in a sawi angin, inthlahdahna vang leh tih ngei tur tih loh vanga thihna hial thleng ang chi-ah hi chuan ngawi liam mai lo a, dan hmanga inhrem ngam a ṭha. Inhrem hi a tuartu tan chuan a na ṭhin a; mahse, ram leh hnam kal zel tur leh mipui tana ṭha zawk turah chuan inhrem ngam a ṭha zawk ang.

Thawhpuite an nih avanga thil dik lo titu leh inthlahdah taka awmte thup leh hum zawnga chêtna hial thil ṭha aiin thil ṭha lo a thlen zawk ṭhin a; mi hlemhlê, rinawm lo, inthlahdah leh mi dik lote humna leh sual tihpunlunna a ni thei. Chuvangin, mualpho pawh huama thu dik tak mipui hnena puanzar ngam a ṭha a, chu chuan zahawmna a keng tel zawk àwm e.

Damdawi-ina thil dik lo leh inthlahdah vanga thihna hial thleng nia langah huaisen taka sorkar a chêt ngam a ṭul. Thil dik lo titu emaw, mahni hna thawk ṭha duh lo leh mawhphurhna ti ṭha duh lote chu hrem tak tak ngam a ngai a ni.