Tiphûrtu leh tichaktu ni ila

Central YMA chuan February 7, 2025 zan khan Aizawlah ruihhlo do chungchanga infuih tharna an buatsaih a, Aizawla YMA branch 109 aṭangin hruaitute leh kumpuan committee member-te telin, mi 900 vel an pung khawm.

Infuih tharna hi kum 2024-a YMA Rorel Inkhawmin a rêl, 'Ruihhlo dona khawngah nasa zawk a hmalak ni rawh se' tih bawhzuina a ni a; ruihhlo donaa hmalak dan turte sawi a ni. CYMA President chuan ruihhlo do turin YMA hruaitu leh member te, nu leh pa leh kohhrante ṭhahnemngai taka pên chhuak turin a sáwm.

YMA rorel inkhawma an rorel te, CYMA Kumpuan Committee leh YMA branch hrang hranga kumpuan committee-te hmalak dante enin, YMA hian Mizoramah ruihhlo a hluarzia te, ruihhlo ngawlvei mai bakah, ngawlvei la ni chiah loa ruihhlo ti ṭhin an tamzia an hre chiang hle tih a lang.

YMA branch hrang hrang hruaitute leh ruihhlo donaa hma latu mi 900 rual hnenah ruihhlo do a pawimawhzia inhrilh thar a ni leh, ruihhlo do tura infuih thar a ni hi a lawmawm tak zet.

Mizoram mipui huap zo tak YMA-in ruihhlo doa hma a la hi a lawmawm tak zet a, rah duhawm tak a la chhuah ngei ang. Thâ thlah loin ṭang zel se, nasa zawkin, fimkhur tak chung leh dan ngai pawimawh tak chung siin hma la zel se.

YMA-in ruihhlo a donaah hian mipui hi tihnualtu ni lo a, tiphûrtu leh tichaktu kan nih a pawimawh. Ruihhlo donaah a hmatáwnga ṭan vek theih a ni lo a, ruihhlo doa theihtawp chhuahtute thláwpa ṭawiawmtu ni ṭheuh thei ila, kan ramah hian ruihhlo hian kiam lam a pan ngei ang.

CYMA President-in a sàwm angin, kohhran hrang hrang te, YMA sub-hqrs, group leh branch tina hruaitute bakah member tin te, mi tin hi ruihhlo donaa theihtawp chhuahtute thâ tichaktu nih kan tum ṭheuh a ṭul ta e.