Sangha chi supply

Anti Corruption Bureau (ACB) chuan, NLUP Implementing Board (NIB) vice chairman leh NIB secretary-te chu Preventuion of Corruption Act hmangin tun hnai khan thubuai an siamsak a; P.S. Case No.5/2016 Dt. 10.8.2016 U/S 13(1) (d) R/W 13(2) PC Act, 1988 hmangin thubuai an ziak lut. Chief minister chuan, NLUP hnuaia sangha chi supply dan hi nikum khan ACB chhui chiantir turin Vigilance department a lo hriattir tawh a ni.

Sangha chi supply hi tun hma aṭang tawha sawi neuh neuh awm a ni a, sum siamna remchangah an hmang ṭhin tih hi titi a tam hle. Department lam hotute leh a chi supply-tu lamte thlengin rinhlelh thuah an hming hi sawi lan ṭhin a ni a, chiang taka inman ni ngai lo mah se mipui ngaih a ṭha lo a, sangha khawia eizawngte pawh an lawm kim ṭhin lo.

Tun hnaiah sorkarin lian takin NLUP a kalpui a, sum pawh tam tham tak a dah. Mi ṭhenkhat sawi danah phei chuan sorkarin NLUP kalpuina tura sum a dah tam avangin thil dangah pawisa pawh a neih loh phah a, tun hma angin sorkar department hrang hrangte pawhin pawisa an nei lo. Hei hi NLUP lama hlawhtlin an tum vang a ni a, NLUP-ah hian sum tam tham tak dah a ni.

Hetihlaia NLUP enkawltu liante hming a lo lang nawlh mai hi a zialo hle a, he thila mawhphurtu tak an nih leh nih loh finfiahna la awm lo mah se, an inhmeh lo hle. NLUP hnuaia thil thleng a ni a, a mawhphurtu tak man an la nih loh avangin a hotute hming hi chu lang tur a ni. He thil kal dan hi chiang taka chhui a ngai a, tuna hming langte hi nge midang zawk tihte thlengin mipuiin an hre duh a, sorkar flagship policy hnuaia ACB-in thubuai an ziah luhna tham thil fel lo awm hi a rang thei anga chhui chhuah ni rawh se.