Rilru fím takin roreltu i thlang ang u

Vawiin February 12, 2025 hian Mizoramah village council leh local council inthlanpui neih a ni dawn ta a, zing dar 7 aṭanga tlai dar 4 thleng vote thlâk hun hawn a ni ang.

Mizoramah district 11 a awm a, district pakuaah VC inthlan neih a ni dawn a, Siaha leh Lawngtlai district erawh chu autonomous district council awmna a nih avangin VC thlan a ni ve dawn lo. Aizawl Municipal Corporation leh Lunglei Municipal Council huam chhungah LC inthlan neih tur a ni bawk.

Tualchhung roreltu tur thlanna hi mipui rorelna bulṭhut tia sawi ṭhin a ni a; tualchhung rorelna aṭanga ram rorelna thlenga kal chho tate pawh an lo awm tawh ṭhin. Hengte avang hian VC leh LC inthlan hi a pawimawh tih a chiang a, a pawimawhna hi mi tinin kan hriat thara kan ngaih pawimawh a ṭul.

Democracy ramah chuan vote thlâk hi a pawimawh em em a, mipui rorelna ram kan nih chhan pawh a ni. Mipui tan khawtlang leh ram hruaitu nih vek theih a ni lo a, kan aiawha roreltu tur kan thlang ṭhin a, kan mi thlante kaltlang chuan ram rorelnaah kan tel ve a ni.

Vote thlâk duh loa ram leh khawtlang hruaitu tur thlannaa tel lote tan mi dangin an thlan chhuahteah a chhia a ṭha lo sawi ve ngawt a inthlahrunawm ṭhin a; sawisel theih loh ni lo mah se, a ngamawm loh fo. Chuvangin, tuna VC leh LC thlan turah pawh hian tel ve ngei tum ila, vote kan thlâk ṭheuh a ṭul e.

Tualchhung/khawtlang hruaitute leh chunga roreltu turte thlannate hi a pawimawh em em a, namnûl mai loin, rilru fím tak nen khawtlang tana ṭha tur ngaihtuah chunga vote kan thlâk a pawimawh.

Vote thlak hi khua leh tui kan nih anga kan chanvo leh mawhphurhna a ni. Vawiina khawtlang hruaitu turte thlangtu ni ve ngei turin vote thlâk ṭheuh tum ila; rilru fím tak nen uluk tak ngaihtuah chungin kan khawtlang hruaitu turte i thlang ang u.