Kângmei lakah i fimkhur hle ang u

Mizoram pumah Kângmei Vèn Hapta (Fire Prevention Week) hman mek a ni a, February 10-15, 2025 chhung hman tur niin, thupui chu 'Kângmei vèn hi kan tu leh fate hmakhua tan a ni' tih a ni.

Bawrhsapte'n hriattirna chhuahin, ṭha taka meilam siam hmasa lo chuan lo hàl khap a nih thu a puang a; lo, huan leh leipui hâl tur neite chu meilam ṭha taka sial tur leh, lo hâl hun hnuhnung March 15, 2025 ral hma ngeia hâl turin an hriattir tawh.

Kum 2009 aṭangin Mizoramah kum tin Fire Prevention Week hman a ni a, kângmei chhuak hi a pawi theihzia inzirtir a ni ṭhin. Kângmei chhuak pawizia Mizoram mipuiin kan hre tlangpui tawh. Chutih rualin, fimkhur loh vanga kângmei chhuak erawh a la awm zel tho bawk.

Kângmei chungchanga sorkar thupekte leh ruahmannate hi ram leh mipui ṭhatna tur a ni a, mi tinin kan zawm a ṭha. Lo hâl hun bituk pawh hâl tur neite'n an zawm ngei a ngai. Mipui náwlpuiin an pawmpui theih harsatna lian tak awm si loa sorkar thupek zâwm lo chu hrem ngei ni rawh se.

Thingtlanga loneitute hi ram tihkan pawizia hretu an ni a, a tuartu an ni bawk a; lo leh leipui pawh nei ngai lo khawpuia mi tam tak ai chuan an hre chiang zawk. Chuvangin, ram tihkan luih hi mi tam berin an duh hauh lo a, an duh hauh loh thil erawh thleng palh thei a ni tih kan hriat a ṭha.

Kângmei chhuak leh ram kângah hian tihluih thil leh fimkhur loh vanga kâng a awm theih rualin, vanduaia kâng pawh a awm thei. Fimkhur taka thil tih a ni chungin vên sên loh thil awm palh thei a ni. Ram tikângtute hrem theih an nih rualin, kângmei chhuah chhan azirin inhriatthiam a ngaihna chin a awm thei. Thuneitute'n thil an chîk a, kângmei chhuah chhan dik tak an hriat a ṭul ang.

Khua a ṭhál chho mek a, khua a ro tial tial rih tura ngaih a ni a; kângmei chhuak lo tura fimkhur a ngaih lai ber hun kan thleng mek. Kângmei chhuakin chhiatna leh harsatna a thlen nasat theihzia hretu vek kan ni a, kan fimkhur em em reng a ṭul. Kan in leh lo, kan neih rohlute kan chàn loh nan kângmei lakah fimkhur naménloa kan fimkhur a ngai e.