Sorkar thu sût hi

Lunglei District Court beih leh magistrate quarters sua-sam vanga Chief minister Lal Thanhawla hoa emergency meeting tun hnaia neih chuan, Lunglei DC chu suspend nghal tura sorkar laipuia thlen an rêl a, Magisterial Inquiry an din nghal. Hemi tuk hian Lunglei DC suspend tura rawtna hi an hlip zui nghal bawk.

Mizoram sorkara mi pawimawh ber hoin thu pawimawh tak an rel a, a pawi-mawh em avangin chawpchilh takin an inkokhawm a ni. He hunah hian chief minister mai bakah sorkar mi pawimawh-te chu an tel kim thawkhat tura ngaih a ni a, anni hian ngun taka an ngaihtuah hnuah Lunglei thil thlengah hian DC chu mawhphurtuah an ngai a, thuneitu sang lama suspend tura thlen an rel a ni.

He thu an rel tûk lawka sorkar bawkin thuchhuah siama DC suspent tir tumna an sût leh hi mipui nawlpui (layman) tan chuan hriatthiam a har hle. DC hi suspend ngei se tihna lam aiin, CM ho meuha an rel ni si, a tuk lawka an sût leh mai hian kan CM hoa rorel hi thil lem ang maiah a chhuah a, a pawi hle a ni.

Lungleia buaina chhuakah hian DC hi a mawhphurtu ber a ni lo thei lo a, thuneitu sang ber a ni. Hei vang hi a ni mai thei, kan chief minister hoa
ṭhukhawm pawhin ani hi suspend tura thlen an han rawt zel a; nimahsela eng thil nge lo thleng mipuiin an hriat tawh loah an han sût chawpchilh leh mai a, thil kal kual dan hi mi naran tan chuan hriatthiam a harsa hle a ni.

Kan sorkar hotu lam hian thu an rel dawn hian an ngaihtuah ngun tawk lo nge, a tuk lawka sût leh hni hne tura thil an kalpui mai hi chu a mualphothlak khawp mai. Chief minister ho a ni emaw, eng level-ah pawh ni se, sorkar aiawha thureltute hian tun aia ngun zawkin ngaihtuah ṭhin se, a tuk lawka sût leh mai mai tura thureltute hi chuan mahni mawng an hlim tia puh loh a harsa hle a ni.