Ṭha takin thawkho se
Mizoramah village council leh local council inthlanpui chu tluang tak neih a ni ta a, vote chhiar pawh tluang taka kalpui niin, inthlan result pawh hriat a ni tawh. Harsatna leh buaina lian tham awm lo leh ralmuang taka inthlan neih zawh thawkhat a ni ta hi a lawmawm tak zet.
India ram state ṭhenkhatah inthlan laiin buaina lian tham tak tak a chhuak a, thih phahte pawh an awm hial ṭhin laia tluang tak leh ralmuang taka Mizorama inthlan kan nei thei ṭhin hi a lawmawm; Mizoram mipui vang a ni.
Tluang taka inthlan a nih theih nan State Election Commission-in ruahmanna an siam a, sorkar lama mawhphurhna neite'n ṭha taka bawhzuiin an tih tur ṭheuh tlin takin an ti a; an chhuanawm hle.
Inthlanna thianghlim a awm theihna tura hma latu Mizoram People Forum-in theihtawp an chhuah a, an hmalaknain rah ṭha a chhuah tih a takin kan hmu zel a, a lawmawm. Political party te, candidate-te leh mipui pawhin rilru thianghlim tak pu chungin inthlan an hmachhawn tih a lang a, a lawmawm tak zet.
VC leh LC atana thlan tlinte hian tih tur leh mawhphurhna lian tak an nei chho nghal dawn. Khawtlang rawngbawl tura inpea inzuar an ni a, mipuiin anmahniah beisei neiin an thlang tling a ni. Khawtlang tana mipui beiseina tihlawhtlingtu ni ngei turin theihtawp an chhuah tur a ni ang.
LC/VC member-te hi mihring ve bawk an ni a, tlin tâwk lohna an nei ngei ang a, mahni hna thawh ngaite an ni ve bawk ang. Chungah chuan mipuiin hriatthiam chin an neih a ngai ve bawk.
Tualchhung roreltu tur thlan dawn apiangin state-a sorkar lai party-in an party candidate-te thlang tura intihna hi a langsar fo. Rorel lai party candidate-te thlan tlin hi a ṭhatna a awm ngeiin a rinawm. Mahse, eptu party VC/LC-te state sorkarin a hrêk bik tur a ni lo a, eptu VC/LC-te pawh sorkarah an inthlahrung tur a ni lo.
State-a roreltute leh VC/LC member-te hi ram leh hnam hmangaihtu, ram leh khawtlang ṭhatna leh hmasawnna duhtu an nih ngai chuan ṭha takin an thawkho tur a ni. VC/LC pakhata party hranga member-te pawh inen hrang loa an thawhho thiam a ṭul hle bawk.