Economy siamṭhatna tur mau

Mizoram chief minister chuan, mau chu Mizoram economy siamṭhatna tur a nih thu tun hnaia Hnahthial a tlawh ṭumin a sawi a, "Hnahthial ram hi raw chìnna tur ram ṭha a tamin ka ring, lo chíng ula, hmapui kan rawn la dawn. Chu chu kan economy siamṭhatna tur a ni dawn. He lai hi a pawimawh em em a, ministry semtu kan nih angin, kei pawhin Horticulture department hi ka thlang a, ka idea neih kha mi dangin an tihhlawhtlin theih dawn loh avangin," a ti. 

Kan ram economy dinhmun kan hria a, thawh chhuah sawi tham nei ve mang lo state kan ni a, a ruh langa sawi duh chuan chawmhlawm state kan ni. Kan ram hruai tawhtute hian an theihna sang ber nena he ram an kaihhruai hnua min thlen chin chu tuna kan dinhmun hi a ni a, sorkar laipuiin hnathawhna tur sum min peka kan tum ve tur (state matching share) ringawt pawh pe hleithei lo khawpa state pachhia kan ni. 

Chu dinhmun chhe tak aṭanga kan ram khaichhuahna tura kan chief minister berin a beisei chu mau/ rua a ni a, a ṭhatna leh ṭangkaina pawh a sawi ngun ta hle. Horticulture lama a 'idea' neihte chu a thawhpui dangte'n an tihhlawhtlin theih a rin loh avangin amah ngeiin Horticulture department chu thlang chat a nih thu a sawi bakah mau chu kan ram economy siam ṭhatna tur a nih thu a sawi. 

Mau/ rua chungchang ṭawngkam ngaihnawm tak tak kan ngaithla zing ta a, hei hi kan state hmasawnna tur a ni tih hi kan CM leh a thawhpuite pawm dan a ni. Chumi atan chuan kum hnih dawn ro an rel chhungin hma an la ṭan tawh a, tun thleng chuan mau leh rua hmanga hausakna kawng chu sawi loh, ei khawp thawh chhuah lam sawi ngam a la ni lo a, a la hma lutuk pawh a ni ang. 

Kan mau leh raw neih sa ring lo a, hmun dang aṭanga lakluh a chi kui ṭiak chawp a, ram hnuaia phun nun a, chumi hnua a phurhna tur kawng laih chawp ngai, rit tham tak mai phurh kual hnua hralhna leh thil siamna aṭanga sum lakluh hmanga kan state economy siam ṭhat hun hi a nghahhlelhawm a; chu hun chu kan ramin a tawng lo a nih chuan he ministry flagship programme hi a hlawhchham a ni ang. 

SEDP pawh engmah loah kan chhuah dawn tihna a ni a - kum thum an la neihah hian sorkar tan chuan mei kawha ṭan laka mau/ raw hmanga economy siam ṭha tura mei kawha ṭan a hun ta.