Lirthei chhiah pek dan

Mizoram Assembly emergency session-ah tun hnai khan, 'The Mizoram Motor Vehicles Taxation (Ammendment) Bill pass a ni. He bill thar hnuaiah hian kum 15 atana chhiah pek dan kalhmang tihdanglam a ni.

Mizorama lirthei neitute ngaihmawh em em, kum 15 atana lirthei chhiah pek leh ṭum khata pek tlak nghal chu sorkarin a tidanglam dawn ta a, a lawmawm hle. Sorkar hian kum 15 chhung atan chhiah a lak chu sawiselna a tam tih a hria a, mipui duh dan an ngaichang hi thil lawmawm tak a ni.

Hetihlai hian sorkarin dan a siam hmasak dawn khan thil a ngaihtuah kim lo hle a nih loh chuan sum a mamawh hle niin a lang a, kum 15 atana chhiah lak tur ṭum khata pek tlak nghal vek kha chu a rit hle a ni. Mi tam takin a âwm lo an tih thu sawi mah se, ram pum huapa lirthei neitute'n lungawi lohna an lantir hmang khera sorkar beng thlentir a ngai a; sorkar hian a tirah a nghawng theih tur thilte ngaihtuah kim se, mahni dan siam tawh sa siam
ṭhat zui nghal ngaia an siam ṭhin hi chu a tira ngaihtuahna an sen tawk loh vang niin a lang.

Lirthei chhiah pek dan kalphung tharah hi chuan lirthei neitu lam tan pawh an hahdam deuh tawh dawn a, mipui tana awlsam tura thil kalpui a ni. Hetihlai hian lirthei chhiah pekna hmun leh a pek dante hi tun aia awlsam zawk hi ngaihtuah zui ni se, tunlai khawvelah online-a pek dante thlengin siam ni se, lirthei chhiah pe tura hun rei tak intlar ngaite hi a bo thei ang a, a lawmawm hle ang.