Inkhawmpui puala sum thawh khawm

Mizoram Ṭhalai Kristian Pawl (MṬKP) Inkhawmpui chu Lunglawnah neih mek a ni a, palai ṭhahnem tak an tel. Tluang tak leh hlim taka an hman a, pawl ang leh mimal anga Pathian rawngbawlna kal zel turah hlawkna an neih ngei beisei ila.

Tun ṭum MṬKP Inkhawmpuia thil thar langsar tak, sawi zui hlawh tak mai chu inkhawmpui palaite aṭanga registration fee mi pakhatah Rs 50 zel an la hi a ni awm e. Inkhawmpui thlengtu tana sum senso hautak lutuk phuhrûkna tura ruahman a ni a; Mizorama kohhran ṭhalai pawl inkhawmpuia a vawi khatna niin a lang.

Inkhawmpui liana palaite aṭanga registration fee lak hi thil thar a nih angin hrethiam lo deuh pawh an awm ve nual mai thei a, ṭha ti leh ṭha ti lo an awm nual pawhin a rinawm.

Registration fee lak a ṭhat leh ṭhat loh chu eng pawh ni se, lak an duhna rilru zawk hi a pawimawh. Registration fee lak an tih chhan–inkhawmpui thlengtu tana senso sáng lutuk tihziaawm duhna rilru hi chu thil ṭha tak a ni. Hetianga thutlukna an siam ngam hi an fakawm.

Inkhawmpui buatsaih tur hian sum tam tak a ngai ṭhin a, ram pum huap inkhawmpui lian phei chu a hautak hle a, pandal sakna atan ringawt pawh sum a ngai tam hle. A thlengtu tan sum tam tak sen a ngai ṭhin. Inkhawmpui thlengtute tana rit lutuk tur tihzângkhaina tura ṬKP hmalakna hi a ṭha hle a ni.

Kum 2015 aṭang khan MṬKP Inkhawmpui pualin ṬKP member tinin kum tin Rs 10 an lo thawh tawh ṭhin a, kum 2018 aṭangin Rs 20-ah an tisang leh a. Hei ringawt pawh hian inkhawmpui thlengtu tana sum hautak lutuk tur nasa takin a phuhru tawh ngei dawn tih a chiang a; tuna registration fee an lak leh phei chuan a ziaawm lehzual hle dawn a ni.

Kohhran pawl dangah pawh inkhawmpui lian puala sum bituk neia member-te'n an thawh khawm hi an awm. Member tamna ber KṬP-ah erawh chuan an inkhawmpui lian, General Conference pualin member tinin pawisa an la thawh khawm ve lo thung a; rawtna lut tawh ṭhin mah se, tun thlengin a la tlang thei lo. KṬP pawh hian an General Conference pual hian member tinin pawisa thawh khawm ve ta se, thil ṭha tak a ni ngei ang. General Conference thlengtu tana hautak lutuk a tiziaawm ang a, inkhawmpui thlen zuam khua pawh an tam leh phah ngeiin a rinawm.

Inkhawmpui engpawh mai hi a theih chin chinah a hautak lo zawnga buatsaih theih a ṭha hrim hrim a, senso tihtlem dan kawng zawn thiam a ṭha. Inkhawmpui a nih tâk avanga sum ren lohna rilru put theih a ni a, hetiang rilru hi chu put loh a ṭha khawp mai. Sum ren tak chung leh senso hautak lo thei zawng zelin inkhawmpui thei ila a duhawm; state rethei tak kan nihna nen pawh thil inhmeh tak a ni ang.