HIV donaa theihtawp chhuah zel
Mizoramah HIV vei thla 10 kal ta, April 2024 aṭanga January 2025 chhung khan thisen endik 1,22,354 aṭangin HIV vei mi 1,669 hmuh chhuah an ni a, hmuh chhuah zat hi endik zat aṭangin 1.36% a ni. Mi 1,669 zinga 61.05% chu mipat hmeichhiatna hman aṭanga kai an ni.
Mithiamte sawi danin, HIV hi tihdam theih loh a ni a, natna ṭihbaiawm tak a ni tih hi mi tam tak ngaihdan a nih a rinawm. Chutih rualin, HIV veite'n damdawi an ei ṭhat chuan rei tak an dam thei tih a ni a; HIV positive an ni tih hmuh chhuahna rei tawh, tun thlenga taksa la hrisel ṭha tak an awm nual.
HIV hi natna ṭihbaiawm tak a ni tih hi phat tur a awm lo a, sawi nêp tur pawh a ni lo. A hlauhawm avangibn invên ṭhat a ṭul a; invên theih tak natna a ni bawk. Vanduai vang liau liaua kai theih ni mah se, vanduai vang liau liaua kai chu an tam lutuk lo mai thei. Mi nun tluang, nun dan dik leh ṭhaa nung tan HIV kai hi hlauh chiam tur a ni lo.
Hetiang a nih rual hian, HIV hian Mizoram a luhchilh thûk tawh hlea sawi a ni. Sorkar aṭangin HIV donaa hma latu tur awm mah se, HIV vei titlahniam tur leh vei thar an awm tawh lohna turin anni hmalakna ringawt chu a tâwk zo lo a ni tih a chiang a; Mizoram mipui zawng zawng, kohhrante leh pawl hrang hrang ṭanrual a ngai tihna a ni.
HIV dona luhchilhtute'n HIV laka invenna tur an sawi tam ber chu condom hman a ni. MSACS Project Director chuan condom hmang tura hmalakna leh inzirtirna chu nupa pawn lama mipat hmeichhiatna hmang lo tura infuihna a nih loh thu a sawi.
Mizorama HIV kaina tam ber chu mipat hmeichhiatna hman aṭangin a nih miau avangin, a taka hma latute chuan condom hman an sawi reng dawn. Nupa páwn lama mipat hmeichhiatna hman hi Pathian leh kohhran duh loh ni mah se, condom hmang tura inzirtirna hi kohhrante'n an hriatthiampui a ṭul.
Mipat hmeichhiatna chungchanga Pathian leh kohhran duh dan leh, HIV donaa kohhranin hma a lak theih chin leh kohhran tana hmalak a remchan lohna chin awm hi HIV donaa a taka thawktute pawhin an hriatthiampui a ṭul ve bawk.
Tih theih chin ṭheuh inhriatthiampui tawn chungin HIV donaah hian ṭanho theihna chinah lungrual taka theihtawp chhuaha thawhho a ṭul a ni ber. I ṭangrual zel ang u.