X-ray khawl leh a enkawltu

Health department-a Radiation Safety Agency Cell chuan, tun hnaiah laboratory neitute tan x-ray chungchang zirhona an buatsaih a; Aizawla x-ray khawl neitute zinga 94.50%-in licence an nei lo tih tarlan a ni.

Mithiamte sawi danin Atomic Energy Regulatory Board hnuaiah registration leh licence tih vek a ngai tawh a, hetiang thil kalphung inhrilh hre turin x-ray khawl neitute hi koh khawm an ni. Tun dinhmunah chuana Mizorama x-ray khawl neitute leh a enkawltute zingah Atomic Energy Regulatory Board hnuaia inziak lut an la awm meuh lo.

X-ray pawimawhzia chu mipui nawlpui pawhin kan hre chiang a, chutih rualin a inkaihhruaina lam leh an inkhuahkhirh dan erawh kan hre ve lem lo. He thil changkang leh ṭangkai tak hi a kal fuh loh palh chuan mihring tana hlauhawm thei pawh a ni lêt ve tho a, hei vang hian fimkhur leh uluk taka kalpui a ngai a ni.

Tunah chuan Atomic Energy Regulatory Board thutlukna angin kal a ngai tawh dawn a, kan duh emaw duh lo emaw x-ray khawl hman zui zel kan la tum chuan dan anga kan inziah luh a ngai tawh dawn a ni. Hetiang deuh hian damdawi lam kaihhnawih thil hrang hrangah pawh hian tun aia mumal zawka inkaihhruaina hi awm thei zel se a
ṭha hle mai a, thiamna zir chhuak mumal loin damlo an en ve ringawt ṭhin te, tualchher doctor tia vuah fiam theih turin man chawia mi an en ve ṭhinte thleng hian khuahkhirh a ṭha khawp mai.

X-ray khawl neitute tana inkaihhruaina mumal tak awm hi state sorkar pawh hian entawn se, tihdamna kaihhnawih eizawnna hrang hrangah hian dan ṭha zawk siama inkaihhruai theih ni se a ṭha khawp mai.