Mizoramah damdawi-in changtlung

Mizoram Larsap PS Sree­dharan Pillai chuan tun hnai khan Prime Minister leh Union Home Minister a kawm a, Mizorama All India Institute of Medical Sciences (AIIMS) din turin a dil a; Mizorama damlote chu sum tam tak senga state pawna an inenkawl a ṭul ṭhin avangin damdawi-in changtlung zawk mamawhna a san thu a thlen. 

Mizoram Larsap-in India ram thu­neitu sang hnena damdawi-in ṭha zawk nei tura dilna a thlen hi a lawmawm takzet a, hei hi tihhlawhtlin theih a nih chuan Mizoramin Larsap ṭhahnem tak a neih tawh zinga hriatreng hlawh ber pakhat a ni ngei ang.

Kan ramah sorkar damdawi-in ṭha tak takte awm ve bawk mah se, natna khirh zawk enkawlna turin khawl ṭha leh changtlung kan nei meuh lo a, private damdawi-in thar awmte pawh chhuanawm ve viau tawh mah se kawng tam takah kan la hnufual hle a ni. 

Mizoramin medical college-te pawh a nei ve tawh a, chutih­laiin kawng tam takah hma­sawnna tur a la awm a, damlo inenkawlna turin mamawh tam tak a la nei a  ni. Hei vang hian damdawi-in changtlung zawk chu kan mamawh a, chutiang min pe tura Larsap-in thuneitute a dil hi a lawmawm khawp mai.

Tunah hian India ramah NDA (BJP)-in ro an rel mek a, kan rama rorel mektu MNF-te hi NDA-a awm tho an ni a, anni lam pawh hian Larsap dilna tichak tur hian Prime Minister hnenah AIIMS dilna hi thawn ve leh thei se a ṭhat a rinawm a; state pawn aṭanga kan state enkawl lailawk tura an rawn dah kan Larsap ṭhahnemngaihna hi kan state tan a ni tih hriaa an thlawp thiam a ṭha hle ang. 

Mizorama damdawi-in chang­tlung zawk a awm ngei theihna turin kan state thuneitute ṭangrualin Larsap bul ṭan tawh hi ṭha takin chhunzawm se, AIIMS kan neih ve ngei theihna turin Mizoram sorkarin bawhzui thei se a lawmawm ang.