Sawhthing hralhna

ZNP president chuan, kut hnathawktute thawhrim rah a thlawna a luang ral ṭhin chu pawi a tih thu a sawi a; Mizoram sorkar chu sawhthing leisak turin a ngen. Sorkarin a duh phawt chuan sawhthing lei nan NLUP sum pawh a hmang thei tih a sawi a, kut hnathawktute'n lungmuang taka hna an thawh theih nan sawhthing rate mumal tak sorkarin puang lâwk ṭhin se a duh thu a sawi.

Mizorama thlai ṭha duh em em, ṭhen-awm state-te leh India ram hmun danga an lei duh em em ni bawk chu sawhtling hi a ni. Mizoramah sawhthing a ṭhat duhzia kan sawi a, state dangah hralh a harsat lohzia kan sawi bawk a; nimahsela tun thlengin sawhthing hralh dan fel tak nei lo ang maiin kan la awm mek a ni.

Mizoram aṭanga sawhthing thawn chhuak thei nia inchhal hi mi ṭhahnem tak an awm tawh a, theihtawp chhuaha beiin sawhthing pawh hi an hralh chhuak hnem tawh hle. Chutihlaiin rintlak taka sawhthing hralhna kalpui a, kuthnathawktu lamin an innghahna ngam tur khawp hi chu kan la nei lo a tih theih - sawhthing hralhna hria kan tihte pawh hian harsatna an nei fo mai.

Thil reng reng hi sorkarin a buaipui tak tak a nih chuan a hlawhtling duh bik a, sorkar hian tha a ngah a, a bân a sei a, ngaih pawimawh a hlawh bawk avangin sorkar tih tawhna lam hi chu a sawt bik ṭhin. Sorkar hian sawhthing hralhna zawn kawngah ṭan han la thar leh se, tun hmaa tih fuh loh leh harsatna awm
ṭhinte rilruah vawng reng lo se, Mizorama kuthnathawktute hma ngaia a pen chhuah a hun hle.

Sawhthing kan thar reng a, a lei duhtu leh a hralhna a awm reng bawk a, a kalkawng hi sorkar hian fel takin ruahmanpui se, sawhthing hralhna kawng tluang tak ngaihtuah chhuah hi a hun tawh takzet a ni.