Mei zu versus zu in

Mizoram hmun hrang hrangah District Anti-Tobacco Squad an awm a, anni hian taima taka hnathawkin puipunna hmuna dan phal loha mei zu an awm leh awm lohte an endik a, sorkar pisaa mei zu an awm chuan pawisate an chawitir a, dan phal loh meizial (cigarette) zuar an awm leh awm lohte vaiin dawr hrang hrangte an dap ṭhin.

Heng Anti-Tobacco Squad-te hnathawh hian rah ṭha a chhuah mek a, tun hma angin puipunaah miin mei an zu tawh lo a, mei zu ve ngai lote tan a thawventhlak ta hle. Sorkar thil tih punkhawmnaah reng reng mei an zu ngam tawh meuh lo a, damdawi-inte leh hmun pawimawh bik mei zuk phal lohna hmunte pawh zahawm takin vawn a ni ta a, hmasawnna lawmawm tak a ni.

Hetihlai hian zu chungchangah erawh sorkar hian ṭan a la tawk lo niin a lang a, dan anga zu zuartu hian zu inte khuahkhirhna lamah ṭan a lak a ngai. Tun hnaiah puipunnaa zu rim nam leh zu rui hmuh tur an awm ta zauh zauh a, sorkar pisaa zu rim namte hial an awm ta. He thil hi sorkar hian a en liam mai mai tur a ni lo a, dan angin hma a la ngei tur a ni.

Mei zial zute mah an vaia an khap thei a nih chuan, vantlang hmuha zu in leh zu rui hi chu man ngei tur an ni a, pawisa chawitir tur an ni. Mizoram sorkar hian Anti-Tobacco Squad a din thei a nih chuan, zu rui vai tur leh a hmun loa zu inte man turin 'Anti-Alcohol Squad' tih emaw, a tlukpui emaw din ve rawh se.

Vaihlo do tur maha sorkar tha chakna hmanga pawl an din thei a nih chuan, zu rui leh a hmun loa zu in ṭhinte do tur pawl hi sorkar hian a din ve thei lo em ni? Hei hi thil ṭul loa a ngai a nih pawhin, vantlang hmuna zu rui leh phal lohna hmuna zu inte vai tur hian sorkar hian ke pen ngam rawh se.