Kan hna inpek dan hi

Comptroller Audit General of India (CAG) report a lo chhuak a, Annual Technical Inspection Report on Rural Local Bodies leh Urban Local Body-in a tarlan danin, Aizawl Municipal Corporation (AMC) chuan, kum 2014-2015 chhung khan contract hna chi hrang hrang 1,037, cheng nuai 1,200.38 man tender chhuah loin mimal hnenah an pe.

Mizorama hna kan inpek dan hi dan kalh a tam hle mai a, hei hi sorkar mai ni loin AMC lam pawhin an rawn entawn ve nghal a, Autonomous District Council thlengin hna inpek leh hnathawktu lakah thil fel lo a tam ṭhin hle. CAG report
aṭang bawk hian Mizoram sorkar hnuaia Rural Development department hnuaiah supply order aia tlawma rangva supply-te a awm a, a zialo hle a ni.

Mizoram kalphungah hi chuan ruling party worker tam tak hi hnathawh mumal nei lo, eizawnna sawi tur pawh nei lote an ni a, an party sorkar huna contract leh supply hna awm theite an nghak a ni ber mai. Hei vang hian sorkarna changtu apiangin anmahni puitu party worker an duhsak lêt a, ramin a tuar ta a ni.

Kan kal danah hi chuan contract leh supply hi dan anga tih hleihtheih pawh a ni lo a, dan lo anga kal hi kan 'system' a ni ta ber mai a, a zahthlakin a pawi hle a ni. Mizoram sorkar a kalsual tawh a, AMC a lo ding a, anni tal hi hetiangah hian inthiarfihlim se a ṭhat tehlul nen, a zual zapui vailenhlo tih ang mai a ni hi a pawi takzet a ni.

Engpawhnise tunah AMC thar kan nei a, anni tal hi chu midangte entawn turin awm thei se; ramin hma a sawn zel kan duh tak tak a nih chuan kan ram ṭhanmawhbawk hna inpek dan fel lo leh ṭawp tak hi tihtawp a
ṭul tawh takzet a ni.