Hri leng dawnsawn dan

Tunlaiin Aizawl veng ṭhen-khatah dengue natna thehdarhtu thosi a awm ngei tih finfiah a ni tawh a, hetihlai hian Health department chuan mipuite chî-âi lo turin an chah. Health department thuchhuah tarlan danin, tun hnaia hri léng bika thisen endik tawh mi 46 an awm a, chu'ng zinga mi pahnih chuan dengue an vei tih finfiah a ni.

Tun hnaiah inbiak pawhna leh chanchin thehdarhna hmanrua a ṭha tawh a, tun hmaa kan hriat ngai loh thil tam tak kan hre tawh. Khawvel let liama hri leng chanchinte kan hre ṭhin a, India ram hmun danga natna darh chanchinte kan hre zung zung a, hei vang hian mi tam tak chu an chiai mai ṭhin.

Hri leh natna leng hi tawng-pawng hlauh loh ngawt chi a ni lo a, miin an nat phah a, an thihpui hial a nih phei chuan inven thiam hi a ngai takzet a ni. Hetih rual hian a invenna lam pawh ngaihtuah chang si loa lo hlauh ve chiam a, chiai vak theih a ni a, heng hi a sawt lo hle.

Chumi piah lamah chuan media lama natna leh hri leng kan puanzar danah fimkhur a ngai a, a nih lohna anga tarlan hi a pawi ber. Thil hlauhawm tak ni si hlauhawm lo anga puanzar chuan mipui an muang sual thei a, a pawi thei hle. Hemi lehlam chiahah hian thil hlauhawm vak ni si lo, hlauhawm leh ṭihbaiawm tak anga puanzar hian mipui a tiralkhel a, harsatna tam tak a thlen phah thei.

Natna leh hri leng a awm hian sorkar lam thuneitute an ṭawng chhuah vat a, mipui hnenah a natna lan chhuah dan an puan a, a inven dan leh inenkawl dante chiang taka an tihdarh vat a ṭul ṭhin. Tun hnaia Aizawl hmun ṭhenkhata dengue thehdarh theitu thosi hmuh chhuah pawh hi social media-ah midangte tiralkhel thei tur thu a darh chiam a, Health department lamin thil awm dan ṭha taka an puangzar hi a lawmawm a, hetah hian duhtawk mai loin dengue hmachhawn turin inbuatsaih rawh se.