Ramvah

Mauchar V/C leh branch YMA-te chuan thuchhuah siamin, tun hnaia North Ṭinghmun khaw mi ram chhuakin an khaw mi ramvahnaa a kap hlum chu an dem thu an tarlang a, "Mauchar ram hi khaw dang mite tan sa pelh, ramvah, sangha man leh eizawnna atana phal loh a nih lai renga khaw dang miin ram neitute nunna hial min lâk sak hi hriatthiam harsa kan ti a, pawi khawihtu kan dem tak zet a ni," an ti.

Mizoramah tun hnaiah ramvahnaa intipalh an awm ta zauh zauh mai a, a pawi hle a ni. Sorkar dan angin ramvah hi khap tlat a ni a, chutihlaiin thingtlangah chuan ramvakmi han tih mai tur khawpa sapela chhuak ṭhin hi mi tam tak an la awm a, ṭhenkhat tan chuan ei hmuhna ṭha tak pawh a la ni hial ang.

Engpawhnise tun hnaia ramvak an intipalh ta fo mai hi ngun zawka ngaihtuah chian a ṭha hle mai. Ram ṭhenkhatah chuan sapel hun hi an siam a, sa kah theih bikte an siam
ṭhin a, hei hi Mizoramah chuan a remchang ve lo. Chutihlaiin thingtlangah chuan mi tam takin sapelin sum an la tuak a, 'eizawnna' anga miin an ngaih miau chuan inkhap a harsa khawp ang.

Chutih rualin dan chu dan a ni a, kan khawsak a harsat deuh vang emaw, kan awmna a kilkhawr vang emaw, kan khaw ramah sa an tam avanga sapel hi thiang ta a ni lo. Dan hi chu zawm theih ni se a ṭha ber a, kan zawm famkim thei lo a nih pawhin mihring intihpalhna thleng khawpa kan che ṭhin hi chu a pawi takzet a ni.

'Tihpalh' tih hian awmzia a nei lo a, intipalh an tam tawhzia leh nunna hial chân an awm zel avang hian, Mizoramah hian ramvah hi bansan ila, sipai nena sapel hi i kalsan tawh ang u.