V Day - thil ṭha tihna atana hman

February ni 14 kha Valentine's Day (V Day) a ni a, kawppuite hnena a bik taka hmangaihna lantirna ní tiin a sawi theih àwm e. V Day pual hian Association for Voluntary Blood Donation leh MSACS leh an thawhpuite chuan Mizoram hmun hrang hrangah thisen pek rûnpui an buatsaih leh a, Mizoram pumah thisen unit 633 pek a ni.

Valentine's Day puala thisen pek hi kum 2010-ah ṭan a ni a, kum tin buatsaih zui niin kumin hi a vawi 16-na a ni. V-Day puala thisen pekah hian kum 16 chhungin Mizoramah thisen unit 11,591 pek a ni tawh.

Valentine's Day hi khawvel ram hrang hrangah ṭhalaite mai bakah, nu leh pa ni tawhte zingah pawh ngai hlutu mi tam tak an awm niin a lang a; Mizoramah pawh ṭhalaite'n an ngai hlu tial tial a, an ngai thutak tial tial niin a lang.

Mizorama nula leh tlangvalte hian V Day-ah hian engtin emaw taka awm tumna, eng emaw tak tih duhna leh tumna rilru an pu lian tial tial niin a hriat. Mi tam tak chuan nawpsip bàwlna hun atan te, mahni leh mi dangte tana ser nung siamna hun atante an hmang tawh ṭhin niin a lang bawk.

Hetiang a nih avang hian Valentine's Day hi nawmsip bàwlna atan ringawt ni lo, a ṭha zawng leh mi dangte'n an hlâwkpui theih tur ni si, hmangaihte tana hmangaihna lantirna renchang ni bawk sia hman ṭangkai dan kawng zawn ve zel hi thil ṭha leh ṭul a ni a. Ṭhalaite'n V Day-a engtin emaw tak awm duhna rilru an neih hi a ṭha zawng leh ṭangkai zawnga hman thiam a pawimawh.

Mizo ṭhalaite'n a ṭha zawnga V Day an hman theihna remchang AVBD leh an thawhpuite'n an buatsaih ṭhin hi a ṭha a, khawvel huap pawha hmangaihna lantirna ni bawk sia V Day hman dan ṭha berte zinga mi a ni hial mai thei. Kum lo kal leh zel turah pawh tàwpsan mai loin, tih zel theih ni se a duhawm.

Kum 16 chhunga V Day behchhana Mizorama thisen unit 11,591 pek tawhte hi mi tam takin an dam phah ngei a rinawm. Hlimhlawp thil leh nawmsip bàwlna thil ni lo, thil ṭha leh ṭangkai, mi dang tana malsawmna nihna remchang atana Mizo ṭhalaite'n V Day an hmang ṭangkai ṭhin hi a lawmawm tak zet. Hetiang zawng hian ṭhalaite pawhin rilru pu chho zel a duhawm e.